蘇永康受靶與網民駁火
許志安與黃心穎偷食醜聞搞到滿城風雨，雖然安仔獲老婆原諒，心穎也得馬國明維護，但兩人似被認定是十惡不赦的罪人，不論親人或好友稍作反應，都會觸動網民神經，遭受連串攻擊甚至辱罵、詛咒，蘇永康就因為畀個「心」表態，遭網民翻舊帳圍攻，他不甘示弱即刻還拖，與網民展開連環罵戰。
許志安背妻與「姣精」黃心穎在車廂鬼混，震驚全城，兩人一夜間形象盡毀，道德品格徹底破產，搞到人人得而誅之！兩人又佗衰家，心穎連累無綫要抽劇、抽歌，而安仔就停工連9月演唱會也告吹，最慘是禍及親人及圈中好友，一個Like一個留言都觸動網民神經，換來轟炸式洗版狂插，包括黃心美、黃心妙、DJ森美、「大肚婆」單文柔、主持黎國輝（阿感），蘇永康更被撻着與網民「駁火」，甚至因為貌似安仔及心穎的杜德偉及蔡一智都無辜「中槍」，遭受網民連環狙擊。
反擊「花生友」：因住骾親呀！
蘇永康因看到鄭秀文發文表態原諒安仔，畀「心」以示支持，怎料即成網民攻擊對象，翻炒他過往有不良嗜好，又指他「結完又離 離完又結 不知所謂」、「不喜歡別人評論，可以不做公眾人物」、「你都識講人哋嘅事唔關你事，咁你走出嚟多嘴做乜呀？蘇永康？who？」激得他逐一還擊，指「呢啲只係我與我太太嘅事用不着妳多嘴，妳咪噏囉」、「妳有妳生活我有我忙碌……祝您青春常駐，合家身體健康……講完！」有網友寸爆留言：「大家傾得咁開心，你又可以繼續凸顯你嘅賤格精神，我哋又繼續食花生，多謝你都嚟唔切添。」康仔完全不客氣回一句：「咁食花生因住骾親呀……你返去點燈啦。」
昨日康仔出席音樂見面會，忙於為6月演唱會準備的他已減18磅，還要多減10磅，稍後要到廣州與中樂團綵排。談到與網民的罵戰，他說：「佢哋都叫雨過天青咗！馬國明講得啱，需要講嘢嘅人都講咗，我哋呢啲塘邊鶴都係畀個Emoji。」昨日他收到很多留言，有支持也有另一邊言論，建議趁復活節，把這些事抹去重新開始。問到可有聯絡安仔？他說：「太清楚佢性格，係需要時間，但每日都有聯絡住佢身邊助手，Sammi就覆咗我哋，佢OK，大家可以放心。」
森美連衰兩鑊捱轟
另外，森美與心穎曾合作節目《森美旅行團》，他因為Like了心穎道歉Post，結果遭網友洗版式留言喪鬧，他說：「因為佢做錯嘢就應該要出嚟道歉，我覺得係一件啱嘅事，就係咁咋！對於有人會有好多唔同嘅推斷，我又理解，因為佢哋極度傷痛，我完全明白佢哋嘅誤會，但我都希望佢哋明白」他不擔心觀眾罷睇其節目：「我冇喺佢嘅社交網裏面同佢哋對答，或者解釋個原因，我真係明白佢哋嗰種痛心，都唔想講多錯多，以免佢哋誤會，透過你哋話番畀佢哋聽，我講清楚點解我會Like，希望佢哋明白！」而他昨晨在電台節目播放安仔一首舊歌《你的男人》，結果惹來不滿的聽眾質問。他解釋是上星期聽眾揀選的歌曲，由於每星期五都有這個重播節錄環節，幕後同事上星期已經剪輯好內容：「所以播完咗我都即刻喺個節目講番，以免太敏感。（有冇下令唔播安仔嘅歌？）我哋又唔會特別避忌，需要咪播囉。」
至於「卸貨」在即的單文柔同樣因為Like心穎的Post，惹來網民咒罵：「人Like你Like，直接向Sammi灑鹽！」又有人指她作為妻子表態支持心穎，對她非常失望。而心穎姐姐黃心妙的社交網，亦有人留言：「公開向Sammi道歉」、「叫你啲女唔好學阿姨……身教好重要」。
|
鍾意就快D Share啦！
|
|
|