點解要咁做呢？
黃心穎背馬國明偷食人夫許志安一事爆出後，黃心穎立即變做負評王畀網民狠插，雖然係咁但都實有持相反意見人士，凌晨有位圈中人爆大鑊，指許志安話同鄭秀文婚姻出現問題諗住離婚，黃心穎先至同佢喺埋一齊，佢只係一個追求愛情嘅女仔，唔明佢點解要一個人攬晒上身唔肯講個事實出嚟，仲話佢先至係受害者！
呢位爆料人就係2016年選過港男、有「爆肌消防員」之稱嘅梁裕恆（Flow Leung），雖然佢落選咗，但係都有拍吓劇例如《飛虎之潛行極戰》等，佢喺社交網上載同黃心穎嘅合照，話有件事不吐不快：「醒起有一日佢好唔開心咁同我講，因為同男朋友好小機會見面，感情出咗問題，又話愛上咗另一個男人係有婦之夫，好內疚。那個是天后的老公，但那個男人說佢哋嘅婚姻一早出咗問題，個男人同佢講會離婚，她才願意跟他一起。個男人唔係有錢？又唔係好樣？佢又唔係賣身，只是一個追求愛情嘅女仔。個男人冇嘢畀到佢，就只是愛錯一個人，係有錯，但罪不至死！」
呢番言論一出現，即吸引大批網民留言，一面倒係鬧爆，有心水清嘅網民話Flow嘅價值觀好有問題，背住男友偷食人夫，就算追求愛情都一定係錯，點解唔分開咗先至一齊？仲有人突破盲點質疑嗰時當紅嘅黃心穎點會同Flow分享愛情經歷？唔少網民留言笑佢想出位都唔係用呢種方法，最後只會令到網民討厭咗佢。
來源 source: http://hk.on.cc
|
鍾意就快D Share啦！
|
|
|