香港近年成為「騙子天堂」，警方過去一年錄得8,732宗詐騙案，較前年勁升近兩成，包括倫敦金騙案、高回報種金騙案、傳銷、網上情緣、電話騙案、呃層樓的「吸血中介」等，不少騙徒至今仍逍遙法外，但社會大眾只關心騙案的手法、騙徒背景等，卻忽略了一班騙案背後的受害者，《蘋果》找到3名陷入無底深潭的苦主，由他們親自剖白受騙，如何令人生大逆轉。經一事，長一智，假如時光倒流，他們能否抵受得住引誘，如果從沒被騙，到底現在又會過着怎樣的人生？
「佢哋（下線）日日嚟我屋企搵我、一日打百幾個電話嚟，鬧我係騙子，搞到我唔敢返去。」53歲的金姐原是一間投資公司的上線，其團隊多達80人，投資共1,000萬港元，但半年前公司爆煲，下線收不到回報，每日上門向她追債，早前她匆匆執拾細軟，提着大包細包「走佬」暫避風頭，從此展開過街老鼠的生涯：「今日去澳門家姐屋企暫住幾日，下星期去大陸親友家避一避，真係好攰，呢啲日子幾時先可以結束？」最艱難的日子，她無臉再面對親友，更想過自殺一了百了，過去數月經過一輪反省，她說假如當日不貪心，就不會被騙，現在應可達成與子女同遊日本的願望，更不會連累身邊朋友輸身家，對此她感到後悔不已。
假如金姐沒有墮入投資公司騙局，她根本一直衣食無憂，搵餐飯並不成問題，一對子女亦早已出身有穩定工作，原本她更計劃享家庭樂，跟子女一同去日本旅行，首度體驗當地風情，可是，現在錢沒了，連家也不敢回，這天她要躲躲藏藏的返回其位於大圍村的家，一打開門，屋內雜亂不堪，尼龍袋、膠袋裝得滿滿的隨處放，少用的電器已入箱包好。《蘋果》跟隨她採訪，也要躡手躡腳的，金姐深怕被業主發現：「因為公司爆煲後，我冇收入，已經幾個月冇交租，業主準備趕我哋走，惟有執好晒啲嘢先。」
原本從事直銷健康產品的金姐，前年年底受一間投資公司開戶口送珠寶，以及高回報的投資計劃所吸引，開始投資3萬多元。第一次投資，僅數十天便賺到3萬多元。見錢易賺，她便借錢不斷開戶，又介紹身邊朋友加入，以賺取佣金；半年間她發展成一個80人團隊，總投資達1,000萬元，但在團隊最鼎盛時，公司突然爆煲，負責人失蹤，此時各人才知是一場騙局。
事發後，下線將矛頭直指金姐根本沒為他們開戶，才令他們沒回報，要求退錢，「佢哋好多都係我啲朋友，同我好熟，知道我住邊，佢哋每日就一大清早上門，又喺村口等我，要我還錢。」試過有一晚凌晨2時許，兩名大漢和一名婦人上門，大力拍打其鐵閘，「我同24歲嘅女驚到唔敢開門，最後嘈醒成條村啲人，驚動鄰居報警，我個女自此唔敢再返屋企，寧願寄居男朋友家。」
下線上門也搞到金姐無法上班，以往定期到健康產品公司見客的她，現在神憎鬼厭：「我去返工，佢哋又上嚟辦公室搵我，搞到老闆唔敢請我。」現時她只能託朋友賣一些人參粉給她轉售賺些微利。每次出街，她都故意低着頭，因為怕撞見下線，「佢哋一見到我，又會指手劃腳、大大聲鬧我係騙子，佢哋仲不斷纏住我，連我行去廁所都跟住嚟。」
金姐每日至少接到逾百個電話和數十個短訊，每朝7時許，電話和短訊響不停，甫接聽就被破口大罵，有時她只好將手機關掉，「話最衰係你，搞到我啲錢冇晒，你係騙子！」過去她亦曾遭恐嚇：「如果限期前還唔到錢，我哋就去迫你個仔代還。我個仔原本做手機維修生意，呢件事搞到我個仔都做唔到生意。」
朋友們日夜不間斷的追債，令金姐心驚膽顫，夜夜失眠，惟弄至如此田地。過去數月，她思前想後，作深切的自我反省，假如她沒這麼貪心，她不會落得如斯田地，更不會連累親朋好友也受騙，「好多下線都係低下階層，有清潔工、地盤工，我都係希望大家搵到少少錢，唔使捱得咁辛苦先介紹佢哋投資，我都唔知搞成咁。」說到此時，她更淚灑當場：「我知道有一位退休公務員將70萬全副退休金投資，結果冇晒，我好似欠咗佢哋。」
她指，今次加入投資騙局令她失去數十位昔日好友，「好多都識咗好幾年，依家變成仇人，我都好痛心，即使我想幫佢哋，我都冇能力。」現時她聽到「投資」二字也害怕，目前只希望警方盡快拉人，「還我一個清白，證明唔係我呃佢哋錢，幫佢哋追番啲錢，等我做番個正常人！」
---------------------------
星期一至五晚上10點半
《動腦Q》Let's Q the money！
http://bit.ly/2QW8LcI
---------------------------
4月18日 10am-11pm
玩《MINI GAME大挑戰》
贏取價值$140 QV潤膚乳液
https://bit.ly/2WigzsG
-----------------------------
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|