第38屆香港電影金像獎頒獎禮昨晚於尖沙嘴文化中心舉行，今年頒獎禮起用32位年輕演員當司儀，昨日齊齊行紅地毯，甚有氣勢。不過始終都不夠前輩搶鏡，角逐影后的蔡卓妍（阿Sa）身穿閃令令晚裝谷胸上陣，周秀娜身穿deep V長裙，開胸開到肚臍，她自爆這襲晚裝雖然鬆身，但依然真空，無懼走光。
相關新聞：32位新主持唔敢遲到
由香港電影金像獎協會舉辦的第38屆香港電影金像獎頒獎禮，昨晚在尖沙嘴文化中心舉行。昨日下午5時半紅地毯開始前，一班金像獎董事局成員在主席爾冬陞帶領下率先進場，然後到由32位年輕演員組成的大會司儀入場。
| | | |
揀唔到胸圍
紅地毯上，女星多以性感爭妍鬥麗。身穿閃閃Atelier Versace晚裝谷胸現身的蔡卓妍，憑電影《非分熟女》第三度角逐金像獎影后，阿Sa謙虛地說：「好開心，入圍已經係肯定，平常心，信心係比之前獲提名嗰次大咗，有時鼓勵係好重要。」周秀娜昨晚擔任頒獎嘉賓，以Stella McCartney大deep V長裙襯BVLGARI首飾示人，她說：「條裙大咗三個碼，因為揀衫時真係好鍾意，所以點改都一定要着到。」雖然尺碼大了變得鬆身，但娜姐笑言絕對安全：「上身係真空，因為好難揀到隱形胸圍，下身就有着內褲。」
相關新聞：黑仔夫妻襯到絕
有份角逐最佳女配角及最佳女主角的余香凝以Valentino古典風圖案低胸透視晚裝亮相，她說︰「𠵱家好緊張，自己除咗有入圍之外，今晚我哋32位司儀排咗一part表演，所以好緊張。」曾國祥女友王敏奕以低胸性感晚裝示人，她說：「好大壓力，要幾百萬首飾戴喺身，仲要着呢啲衫，要做好多準備工夫，會怕走光。」問有否得到男友批准，王敏奕笑說：「佢冇comment，我諗佢覺得我着乜都係咁，都係咁靚囉。」
謝安琪真空
憑《翠絲》入圍「最佳女配角」的惠英紅，昨晚一身珠光寶氣，她說：「想精簡，低調之餘奢華，揀金色水晶，襯托珠寶，價值幾百萬一定有，有呢啲襯托信心更大。」而與惠英紅一樣以Prada晚裝現身的有影后候選人曾美慧孜，兩人性感中又見秀氣。謝安琪穿上黑色西裝，真空上陣的她說：「黐咗好多膠紙。老公都睇過，得到佢同意，都相信佢品味，好滿意。阿仔冇睇過，阿仔代表香港去咗外地參加足球比賽。」
至於有份角逐最佳女配角的周家怡罕有晒大deep V，與張靜初一白一紅雙V輝映，鄧麗欣以彩色條紋裙亮相，甚有生氣。曾經跟澤東電影公司合作《一代宗師》的韓國女星宋慧喬壓軸現身紅地毯，她宣佈正式簽約加盟王家衛旗下的澤東電影。
採訪：張俊銘、黃曉妍、曹家誠
攝影：葉君海、仇志德、沈健程
|
鍾意就快D Share啦！
|
|
|