大台重頭劇《鐵探》熱播，惠英紅加許紹雄夠入戲，仲有黑仔、林偉，戲味夠晒濃。唔只前輩做得好，連班後輩都做得唔錯，係呀，講緊發瘟方紹聰，單係造型已經夠突出嗰個。方紹聰喺劇入面嘅角色係越南軍隊，主要對手係黑仔、林偉同林利，聽佢講，發瘟呢個角色，係佢入行十年嚟最有突破嘅一個。他說：「今次角色好特別，可能係我入行十年以來，最嚴肅、最認真同最惡嘅角色。」幾個對手都係好戲之人，方紹聰今次堅有壓力。「未開拍前其實都好大壓力，因為要對幾位前輩級人馬做對手戲，尤其是黑哥，我諗住同佢哋合作，如果都係做小弟、下靶角色，應該都無問題，但角色名叫「發瘟」，有少少神經質，會鬧其他人，有啲場口會指住黑哥嚟鬧，或者同林利哥有啲言語衝突，所以未開拍之前都好大壓力，點樣可以做到氣場出嚟。四位當中資歷最新一定係我，要喺裡面佔一席位，或者個氣場可以接近佢哋，我自己都覺得有啲困難。」
方紹聰話多得監製蘇萬聰畀咗一個好好嘅造型佢，令佢好快揣摩到個角色要點做。「基本上著好衫同整好紋身，我已經即刻知道要點樣處理角色。到正式拍攝時，幾位前輩，尤其是黑哥都對我好好，畀我好多發揮空間，我記得第一場要揸槍指住佢個頭，佢叫我可以大膽啲，俾啲力槍嘴掂實佢個頭，因此我哋成為咗朋友，整個拍攝過程都好開心。」佢好享受拍《鐵探》嘅過程，而頸上嘅紋身，反而令佢好難忘。「如果睇相會見到我頸上面有個好有型嘅紋身，但呢個紋身係劇組化妝同事幫我好容易咁整上去，兩個人用十五至二十分鐘一齊整嘅，一個負責揸穩張紙，另一個人負責噴顏料，但最辛苦其實係落妝過程，要用落妝油不停捽頸，大約捽半個鐘至四十五分鐘先會甩，所以去到後期都捽到條頸嘅皮膚變薄，有少少擦傷，但我覺得呢個紋身對我嘅角色絕對幫助好大。」仲記得方紹聰上年喺《特技人》中憑糯米一角跑出，接受壹仔訪問時仲話自己一路揸緊貨車送貨賺生活費，唔知而家佢仲有冇揸貨車呢？「當然就一定有啦，因為TVB嘅人工只係得好少，真係難以生活。而家比較好嘅係，之前出咗一篇報導，而家出去工作時會多人認識咗我。同埋而家香港人普遍都知道做演員好辛苦，一定要出嚟兼職，佢哋都會好支持我，我都聽過好多次，叫我努力，同埋堅持落去，好多謝大家。」
來源 source: http://nextplus.nextmedia.com
|
鍾意就快D Share啦！
|
|
|