鄭少秋勸股民：5月信吓邪！
「丁蟹效應」又嚟料！鄭少秋新劇開播不久，昨日港股一度大跌1,125點，直言「丁蟹效應」已幻滅的「鄭大師」秋官呼籲股民要信「五窮六絕七翻身」，他說：「都要信吓邪，等吓大家咪入吓貨先囉！」惟根據往績，劇集內容愈慘烈，港股更勢危！
由鄭少秋、陶大宇、江若琳主演的ViuTV新劇《詭探前傳》播出一星期，開播時恒指沒有太大上落，不過於昨日第二周開播，恒指一度瀉逾千點，大批股民被殺個措手不及。其實今次股市大跌，很大原因是美國總統特朗普突然宣布向中國進口貨品加徵關稅，但信邪的網民又覺得是「丁蟹效應」作怪！
新劇好評嗌慶功
其實「丁蟹效應」存在多年，但凡有秋官的劇集播出，無論新、舊都有其威力，而且過去應驗率高，就連外國都曾報道過，所以今次他主演的《詭探前傳》首播，股民都不敢掉以輕心，看來「丁蟹效應」並非秋官所言「已幻滅」！他昨日就此回應：「今次丁蟹都搞唔掂我都服咗特朗普！」又謂有留意貿易戰：「個股市都係受佢（特朗普）影響啫！其實股市仲有一個流傳，就係五窮六絕七翻身，最近五月開始，都要信吓邪，等吓大家咪入吓貨先囉！」
秋官相當緊張《詭》劇，不認為會拖累股市，並透露劇集大獲好評，收視成績比過往ViuTV播自製劇以倍數增長，網上點擊高出六倍，劇組所有人都很振奮。他笑言公司應該舉行慶功宴：「大家都有功勞，我要多謝大宇咁爆，令到我同佢個角色對比更大，更有戲味！」
陶大宇：咁就發達喇！
至於向來有留意股市的大宇，認為這次跌市不能入秋官數，並笑說：「如果真係關秋官事，咁就發達喇，我老虎蟹都買跌真係充滿娛樂性！老實講，今次又唔可以賴丁蟹（秋官），大家如果有留意，都知係特朗普突然宣布對中國貨品加徵關稅，咁啱我哋個劇播緊啫！同『丁蟹效應』唔多關事，以上說法，只可以話係穿鑿附會啫！不過，我同『老竇』開工時，佢都有講笑話：『阿仔，如果我次次出嚟個市都跌，我就唔使拍戲、唱歌』」至於另一「蟹仔」邵仲衡則說：「『老竇』嘅力量不容忽視，跌吓添喇！（有冇聽秋官講趁低入貨？）志不在股，我心繫磚頭（買樓）！」
另外，視秋官親如父親的江若琳昨日在電話中代喊冤：「唔好屈我『老竇』都唔關佢事，問題喺美國嗰邊，況且樓市、股市有上落都係好正常嘅事。（有冇呵番秋官呀？）唔使！佢見慣風波，大家亦唔使驚，繼續支持我哋部劇，個市一定會升番o架！」
|
鍾意就快D Share啦！
|
|
|