【新增動新聞】
建制派夾埋立法會秘書處，無理DQ民主派涂謹申，唔畀佢再主持《逃犯條例》修訂法案委員會，今日個會仲改埋期，民主派就反客為主，繼續開會。正當一眾建制派話要「杯葛」呢個會議之際，佢哋嘅「豬」隊友、「恩恩豬」容海恩竟然舉住塊牌，走入會議室、行去主席枱前示威；雖然口口聲聲話「今日無主持，唔係會議」，但又舉手輪候提問喎，咁同間接認同個會議，有咩分別呢？
呢幕咁荒謬嘅小丑鬧劇，自然吸引網民改圖啦；佢個「擂台舉牌女郎」樣，即刻變成網上「潛力圖」，俾網民瘋狂key上其他標語，甚至key走會議廳個背景，配上當年鄧小平同戴卓爾夫人中英會談張相，甚至係習總現身嘅人大會議。網民話，如果今日個會都唔算會議，咁當年中英會談其實都唔係會談啦。咁又係呀，中共簽完《中英聯合聲明》都可以話無效，當年嘅會談成果，今日仲淨幾多？呢個惡搞都真係幾高汁。
容海恩嘅搶fo嘢，又點止咁少呀？當佢離開會議室嗰陣，竟然同民主派會議召集人毛孟靜「鬥嘴」。毛姨姨話，佢當時問日前抱B進入會議廳嘅容海恩：「How are you going to be answerable to your baby?（你將來如何向你的嬰兒負責？）」，容海恩當時答：「I don’t know! But you don’t have babies!（我不知道，但你沒有任何嬰兒！）」毛姨姨一聽到，即刻反駁：「I have two sons, they were babies.（我有兩個兒子，他們都曾是嬰兒）」，仲好慨嘆咁問記者：「你哋話（容海恩）係咪白痴吖？」
---------------------------
【六四30】專頁
守住真相，拒絕遺忘
https://64.appledaily.com.hk
---------------------------
追蹤真相 守護公義
按此免費訂閱支持蘋果 無阻盡覽
https://hk.adai.ly/PMtkKQIUBV
| 容海恩離開會議室嗰陣，竟然同民主派會議召集人毛孟靜「鬥嘴」。《蘋果》製圖、原圖由許頌明攝 | | |
| |
|
鍾意就快D Share啦！
|
|
|