時捷集團主席嚴玉麟的寶貝女嚴紀雯（Carmen）下月出嫁，下月14跟15日跟家族經營建材生意的Jeffrey於君悅酒店舉行世紀婚禮，將為人妻的Carmen日前接受訪問，戴着5卡求婚鑽戒、一身貴氣打扮現身分享待嫁心情，Carmen用上一年半時間籌備婚禮，以百萬打造豪華婚禮，Carmen說：「婚禮嘅主題叫紫色遊園夢，我同Jeffrey都商量過，想將場地打造成一個小小嘅花園，紫色好浪漫，而婚姻就好似花園咁，我哋要守護住，要慢慢去經營。我嘅心情都好緊張，始終係人生一樣好重要嘅事，我對所有嘢嘅要求都高㗎，希望所有嘢都好好睇睇，大家有一個不一樣嘅晚上。」Carmen是個非常傳統的女生，婚禮的所有斟茶接新娘傳統也跟足禮節。
婚禮的6位姊妹團成員份量十足，包括伴娘文詠珊、姊妹有賭王千金何超盈、「麻雀館大王」石鑑輝家族後人石佩藍與大馬富豪陳志遠女兒陳雪鈴（Chryseis）等，談到3月時於泰國曼谷舉行的bridal shower，Carmen指這是她人生中最開心的旅程，她說：「我真係覺得好幸福，有呢班咁好嘅朋友，我係一個唔容易俾人了解到嘅一個人，佢哋真係好了解我，好sweet、好感動。」
Carmen父母相戀46載，他們的愛情經歷，也成了Carmen的模範，她說：「我父母13、14歲開始拍拖，大家都係初戀，而佢哋到而家呢刻嘅關係都好好，我哋成日都會一家人一齊，爹哋係一個好顧家嘅人，所有嘢都照顧得好周詳，係好幸福，以佢哋為榜樣絕對係好啱嘅形容詞。對我嚟講一段婚姻大家要互相扶持，呢個好緊要，我知道一定有好多考驗，開心嘅時候一齊過，唔開心嘅時候一齊過難關，希望所有嘢係好。」婚後Carmen將到南非度蜜月，過一輪二人世界後才實行生B大計。
提到未婚夫，Carmen大讚Jeffrey細心，二人相識兩星期便拍拖，拍拖一年半已認定對方，Carmen直言不算浪漫的Jeffrey去年2月卻製造了一場驚喜求婚，令Carmen招架不來，她憶起當時情境笑說：「我哋去咗LA旅行，有一晚佢話約咗個朋友食飯，到咗酒店lift門一開我就見到自己啲相，由嗰一刻我個腦就完全空白，冇晒印象，完全唔記得，直到戴戒指嗰刻，真係嚇親，太驚訝！」對於夫妻相處之道，Carmen說：「其實我同Jeffrey都係好理性嘅人，由拍拖到而家都未鬧過交，大家feel到個人忟憎就行開啲，再講番啲嘢令大家舒緩番，我都唔係一個太衝動嘅人，所有嘢都可以講出嚟，鬧交係好傷感情嘅一樣嘢，所以大家都真係好夾，搵啱人！」
婚後的Carmen將搬離娘家，Carmen跟母親關係非常要好，一想起便不捨，她說：「已經開始唔捨得爹哋媽咪，尤其係媽咪，我同媽咪由細到大關係都好close，close到一個位係如果我返工唔同佢say bye bye，佢會話我，每晚返屋企一定會有兩個傾偈嘅時間，我去咗英國讀書10年，未試過超過兩日冇通電話，感情好深厚，媽咪有叮囑我要管理好自己屋企，因為媽咪管理我哋屋企係100分，如果我做到佢嘅一半已經好犀利，希望我可以做一個好嘅媽咪、好嘅老婆。」
嚴紀雯父親嚴玉麟白手興家，屋村出身的他經營電子生意起家，一手創立時捷集團並上市，現時市值逾10億，爸爸是成功的企業家，Carmen活躍於社交圈，但卻沒有半點驕縱傲慢，她有禮、謙虛兼孝順，其實做人做事，父母對Carmen也有所領悟，她說：「我生活層面上有好多唔同嘅朋友，做朋友完全唔應該有階級觀念，要對人真，我都係對人真心、好直接嘅人，做朋友係要用時間維繫，最緊要真心，係好緊要。我媽咪係完全唔怕蝕底嘅人，完全唔計較，零脾氣，我身邊最close嗰個人成日都係咁嘅時候，我多多少少都學到嘅。」
Carmen小學就讀女拔萃，之後到英國讀書，畢業於倫敦經濟學院社會學系的Carmen，現於國際地產大行萊坊任投資部副董事，婚後她沒有停下來的打算，她說：「我係一定要做嘢嘅人，唔可以同社會脫節。」Carmen指哥哥嚴子傑跟弟弟嚴子諭已替父親打理家族生意，自己做女沒有半點壓力，做自己喜歡做的事，她說：「一直我都覺得自己好幸福，但永遠少咗愛情嗰部份，愛情永遠係缺少嘅一部份，自從Jeffrey求婚之後，有埋終身伴侶，佢連我缺乏嗰部份都填滿咗，已經完滿。」
父母均曾擔任仁濟醫院主席，Carmen也替家族接棒行善成為總理，她說：「爹哋媽咪教落，做好自己本份，有能力就要貢獻社會，可以幫到人就幫，而家仁濟都有去探訪，媽咪set up咗個項目叫愛心小天使，我鍾意同啲小朋友一齊去探訪啲老人家，派福袋，見到佢哋咁開心自己都好開心，呢啲要由細灌輸畀小朋友，非常之有意義，未來我教導小朋友都會係咁。」
攝影：林德雄
攝錄：葉君海
場地提供：AMMO Restaurant and Bar
--------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片！下一個爆料王就係你
https://bit.ly/2Guolu9
|
鍾意就快D Share啦！
|
|
|