曼聯「民選隊長」安達靴里拉，拍片正式宣布季尾離開紅魔鬼。呢名西班牙中場，同球會一直傾唔成新合約，將以自由身離開。向以堅毅不屈而且勁有鬥心見稱嘅靴里拉，深受曼聯球迷歡迎，認為佢比保羅普巴貢獻更大，而且應被選任為隊長。可惜紅魔鬼並冇留住呢名鐵血中場，魔迷紛紛於網上留言，不滿球會決定。
安達靴里拉剛於社交網上鋪出影片，交代自己將會離開奧脫福：「我嘅心係紅色，當我初加盟曼聯、第一次着上紅魔波衫後，已深深認清呢一點。曼聯全球擁有數不盡嘅球迷，佢哋都尊重球員，會記住球員為球會付出一切。每次佢哋唱起我個名，都會覺得好特別。當感受到佢哋嘅認同，我感到無比驕傲。」
「每次我代表曼聯上陣，無論最後贏定輸，又或者無法上陣都好，都深深感受到球會對我嘅意義。我曾為曼聯落場接近200場賽事，每一場都會記於心底。為全英國最偉大球會上陣，實在係無上光榮。我好多謝呢5年，曼聯為我帶來嘅所有嘢。」
安達靴里拉今年29歲，曾效力薩拉戈薩同畢爾包，14年開始轉投曼聯，其間於聯賽上陣132場射入12球，本季於後摩連奴時代曾成為新帥蘇斯克查心目中嘅正選。預料佢將以自由身，下季轉投法甲豪門巴黎聖日耳門。
來源 source: http://hk.on.cc
|
鍾意就快D Share啦！
|
|
|