近年不少3字頭的女明星都爭相雪卵，為將來生BB作準備，42歲的康子妮（Lily）剛剛相反，揚言：「我收晒工」
康子妮06年嫁給林曉峰，27歲做媽媽，兩年抱兩，如今大仔林寶15歲，細仔林熙14歲，現在仔大仔世界，已經各自有女朋友。康子妮坦言有點失落感：「有段時間會，尤其星期六夜晚食飯，一個去拍拖，一個跟同學開Party，老公又有自己節目，得我一個食飯。」不過，Lily強調好享受一個人的世界，可以做自己喜歡的事。
年紀輕輕已經做媽媽，Lily坦言當初亦有迷惘，她說：「我嗰時個age，身邊冇朋友咁快生小朋友，冇人同我傾，好多中學同學而家先生BB，我嗰啲已經大人咁。當年媽咪聽到大仔得3個月大，又有咗細佬，佢哋都係9月出世，相差1年，阿媽都話：『你咪唔使開工？』我係唔知點嘅，好多矛盾嘢，但都過咗咁多年。」為金錢煩惱？她說：「成日有啦，所有artist都有。」有沒有後悔？她說：「冇，能夠組織一個家庭係開心嘅，但無奈，因為冇諗住咁快唔做嘢，好多取捨係我冇預期。」
Lily和林曉峰在3年前才能成功「上車」，部份首期更是由Lily父母幫忙支付，她解釋：「而家買樓好難，冇能力就係冇能力，冇得夾硬，我哋亦錯過好多上車機會。但係我父母好好，永遠都好就我，我屋企人唔係話：『你睇，又要我哋幫你。』而係想一齊合力做一件事，計過數，唔係好辛苦先實行。」
07年約滿無綫後，Lily淡出幕前，經濟重擔落在老公一人身上，她便專心相夫教子；直至近年才復出做自己喜歡的音樂，成為鄭伊健和歲月友情系列巡迴演唱會御用樂手兼和音，她說：「嗰時每逢星期五、六、日都要出埠，佢哋（囝囝）都習慣呢個模式，Daddy媽咪係要出去做嘢，嗰兩年我都會收到電話同email，話你個仔冇交咩咩咩功課，你個仔喺學校同人有啲咩嘢，我都有啲難過，因為唔可以成日陪住佢哋。」
Lily本身頗有音樂才華，16歲考獲鋼琴演奏級、大學在多倫多讀音樂，但她不想做虎媽，她說：「邊個唔想仔女讀到書，冇得講，但讀唔到係咪代表唔成功？唔係我做到，佢一定要得，好多嘢都係佢得我唔得。」她承認大仔讀書成績麻麻，但去年已有公司邀請大仔試鏡，她笑說：「我哋知佢唔係讀書材料，佢自己都知，今年讀國際學校year10，等於中四啦。成日有人話佢高大，幾好樣，我話：『吓？』，我見親佢都係啱啱瞓醒，點入行呀？我都有問過哥哥有冇興趣做Artist，佢用低沉語氣話：『好吖！』咁即係點呢？佢份人就係咁隨意，你話乜就乜。反而細佬好鍾意結他、玩啤牌，一早講咗唔想入行，知自己唔係娛樂圈嘅材料。」是否會幫大仔進軍娛樂圈？Lily笑謂：「我都力捧唔到我自己，但佢話想，我同老公一定幫。」問到會否再生？她決絕謂：「我收晒工啦，一定唔會！細路都咁大個，而家冇呢啲精力，反而幾享受自己做嘢。」
Lily最近「出山」做幕前演出，孖住老公一齊主持ViuTV真人騷節目《愛我嗎？愛你媽！》，是關於兒子、奶奶與媳婦的倫理關係，Lily笑說：「初初都擔心，香港人咁要面，點會喺鏡頭前不和。最初係奶奶同媳婦一齊去旅行，後來加入阿仔，成件事化學作用唔同晒，嗌交嘴臉出晒嚟，我哋開心嘅，因為真人騷就要呢啲，開頭擔心，後來放心，但最終都見到大家係好care對方。」問到現實中與奶奶關係？Lily好識賣口乖：「我奶奶OK㗎，佢係好識做嘅老人家，唔會囉嗦，凡事適可而止。」
採訪：嵐山
攝影：陳俊強
攝錄：沈健程
-----------------------------
【新聞有價】6月17日起 繼續撐蘋果
http://bit.ly/2IJ24ZR
--------------------------------
【記住63836568】全民爆相爆片！下一個爆料王就係你
https://bit.ly/2Guolu9
| （攝影：陳俊強） | | |
| | | |
| | | |
| | | |
| |
|
鍾意就快D Share啦！
|
|
|