「我希望你能成為一個天使，一直護着我和媽媽，亦能在天上比在這個世界上更幸福快樂。最後，希望你照顧着公公和爺爺，坐在天主的身旁。我亦會做你的工作：照顧好媽媽。多謝你照顧咗我9年，希望在天上能重遇」今日父親節，13歲的謙謙寫信給天上的爸爸——鄧景輝。
撰文：余燕儀
攝影：仇志德
相關新聞：安志杰樂做呷醋爹哋
有「新聞王子」之稱的鄧景輝，於15年12月24日、結婚12周年前夕墮樓身亡，終年51歲，遺下任職空姐的妻子Connie和兒子謙謙，兩母子相依為命，現在謙謙已經13歲，在親友們的愛和支持下，兩母子走出陰霾，以笑容迎接失去爸爸的父親節。
父親節前夕，兩母子在太古城寓所接受《蘋果》專訪，充滿正能量的鄧太說：「其實阿輝走咗之後，第一年我哋係冇過到父親節，因為我爹哋喺6月走咗。」鄧太的爸爸於15年12月確診第4期肺癌，醫生指只餘半年命，她說：「當其時12月真係發生好多事，我爹哋cancer，謙謙突然間出水痘，其實阿輝嗰個月都好多病，我已經叫佢睇醫生check清楚，因為冇乜時間理佢，我要睇住爹哋，陪佢出入醫院，最後爹哋喺父親節嗰個月走嘅，第一年嘅父親節真係好忙，要搞爹哋喪禮，嗰年匆匆過咗。」
| | |
「好掛住一定有」
人生無常，第二年父親節都帶着悲傷，鄧太說：「咁啱爺爺（鄧景輝父親）病危，嗰年父親節我哋有食飯，爺爺淨係認得謙謙，握住謙謙隻手，結果佢都9月走咗，所以父親節對我哋嚟講，係比較傷感同回憶多啲，因為好似好多事發生，我覺得係一個思念，思念公公、爺爺同爹哋。」
當年謙謙只有9歲，時間的洗禮，接受爸爸離去的事實，現年13歲的他大個仔了，變得堅強了，他說：「都過咗咁多年，都慣咗，好掛住一定有，但係都冇以前一諗起佢就傷心嗰啲。」鄧太說：「始終我哋信仰好強，成家都係天主教徒，每晚都有祈禱，感謝天主、爹哋、公公、爺爺、婆婆，已經走咗嘅人，佢哋喺天堂，感謝佢哋睇住我哋，其實我哋每日都有同佢哋傾偈，講吓發生乜嘢事，謙謙喺學校啲嘢，開心與唔開心，我哋一定唔會忘記，呢個係習慣。」
母兼父職是否好辛苦？鄧太說：「我就唔係咁辛苦，好彩我有屋企人，家姐就辛苦，因為負責睇佢（謙謙）啲功課，我就置身事外，同佢玩多，帶佢去旅行。」阿輝生前對仔仔功課好緊張？鄧太笑說：「太慈父。」謙謙：「佢同媽咪一樣，都係唔理。佢哋放工返嚟，咁啱我都放學，大家癱喺張床度冇嘢做。」鄧太大笑：「我哋一直都係用呢個方法。」
雖然只有短短9年時間相處，但謙謙視爸爸為偶像：「最崇拜佢講嘢囉，雖然佢唔係同我講得好多嘢，但睇佢啲新聞，有一次爸爸帶我去睇佢做嘢，見到佢報道，幾型！」有冇諗過將來做記者，好似爸爸一樣？謙謙說：「冇呀，因為太辛苦，我一定唔肯（凌晨）4點鐘起身。」鄧太：「因為爹哋嗰時4點鐘起身，差唔多下晝4點返嚟，所以7、8點就要瞓，嗰幾年作息都係咁，佢好辛苦。」
相關新聞：Oscar落淚感激爸爸
母子坦白無隱瞞
失去至親，怎樣走出陰霾？鄧太說：「我一直同謙謙關係好好，會同佢講所有嘢，冇任何隱瞞，包括爹哋點樣走，因為佢嗰晚喺我家姐屋企。（鼓勵謙謙）不如你自己講呀，嗰朝聽到姨媽話爸爸走咗……」謙謙低聲說：「呆咗！跟住……一開頭就喊，但好快平復番，跟住問姨媽：爸爸點走？跟住姨媽叫我留喺間房，因為佢要通知好多人，所以我自己留喺間房，但直到爸爸喪禮至喊，嗰段期間冇乜點喊。」
鄧太說：「我返嚟嗰時佢喊囉，攬住喊咗一次，爸爸喪禮先至大喊。可能佢見到我傷心，當時我喺北京，自己都喺酒店大喊，覺得好震驚，定下嚟我就問家姐：謙謙點呀？佢話謙謙OK，解釋咗畀佢知爸爸跳樓走，佢都明，佢鎮定咗冇嘢，等我返到香港，我哋有攬住喊。我係比較向前望嘅人，冇諗點解，諗咗都解決唔到，要做嘅係點搞阿輝嘅喪禮，最緊要其實都係佢（搭着仔仔手臂）、都係我嘅仔，因為生嘅人我哋要睇，死嘅人唔係話唔需要，係一種尊重，我喺佢面前唔掩飾喊，因為我覺得喊係一種懷念同讓愛繼續行嘅路。」
強媽鄧太跟仔仔的相處，最重要是溝通：「我全部嘢都同佢講，當佢大個知道，點解媽媽講大話，佢會仲唔開心，我畀佢知道𠵱家點做，就算今次訪問，都係想畀人知道佢走出嚟，啲人話唔好提，佢哋傷心，其實傷心個個都有，我覺得講出嚟係好，畀大家一個反省，譬如阿輝係抑鬱症走，屋企人唔可以怪佢，譬如我返工都有同人分享，畀人一個鼓舞，家人點樣行番出去。」
「我哋唔會孤單」
兩母子細看昔日全家福、父親節卡、阿輝生前親手為兒子做的portfolio，鄧太笑說：「呢份謙謙升小一，阿輝自己做，佢最大貢獻幫仔仔考到一間好學校。」今年父親節，謙謙想如何度過？他說：「約咗契爺同代父。」鄧太：「契爺係阿輝小學同學，好錫佢，代父睇住佢大，多咗人錫佢，我真係覺得感恩，我哋兩個唔會孤單，唔應該唔開心角度去諗，佢永遠喺心入面。我需要感恩，好多嘢上天編排好，唔應該有怨恨，我覺得阿輝都唔想我哋唔開心，因為佢知道我有能力帶住佢，開開心心。」最後，謙謙說：「父親節快樂！公公、爺爺、爸爸！希望爸爸喺天堂同公公、爺爺玩得開心啲。」
|
鍾意就快D Share啦！
|
|
|
