陳逸璇（Jolie）早在二十出頭時簽約環球唱片正式出道，當時為2004年，轉眼十多年後今天的她仍是環球歌手，但其間Jolie經歷過解約轉行做保險、跟墨西哥籍丈夫結婚再離婚、然後又成為爵士樂團女主音，到去年才再度重簽環球。她形容自己人生兜了個大圈，終於在今年推出新歌《短暫的新分》，彷彿呼應著過去的一段不太成功的婚姻，這日Jolie在九龍塘接受《蘋果》訪問，談談為何第一支回巢歌就挖自己瘡疤。
歌曲由Eric Kwok和林若寧撰曲詞，這組合原來亦是Jolie初入行的合作班底，婚姻為主題是Eric提議，Jolie承認離婚初期的確不想多提：「唔想講係因為始終係一件心痛嘅事，似一個烙印咁。行返出嚟需要好大勇氣同好多人支持，既然有機會都想做一隻有意義嘅歌幫大家療傷，同時畀少少支持一啲經歷緊同樣事情嘅人。」Jolie回憶婚姻結束初期完全沉溺在傷心，每日以淚洗面，但這階段早已過去：「其實計吓已經係4年前嘅事，我相信每個人作出離婚決定時都經過好多思想掙扎，結得婚點會想離婚？必定係試過好多唔同方法去挽救，到真係做決定一定係好狠心好絕。」
事實上Jolie直言問題早在結婚初期已出現：「基本上一結婚就出問題，段婚姻維持咗兩年幾，但我考慮離開已經考慮咗兩年，當時我真係用全力希望挽救。」最大的問題源於文化差異和價值觀不同，Jolie表示：「結得婚當然係想建立一個家庭亦想要小朋友，但可惜喺呢個男人身上見唔到佢想承擔婚姻責任，我真係睇唔到，所以好難行落去，而且佢屋企喺美國我係香港，大家基礎上好唔同，香港男仔唔使講佢都知做老公嘅責任，但可惜喺佢身上見唔到，結果無奈地要分開。」
Jolie直認當時太快做決定：「我都認自己係衝動，覺得戀愛大過天，我愛佢就得㗎喇，所有嘢都聽唔到睇唔到。事後我有問番爸爸媽媽，當時點解你哋見到有問題唔講？點知佢哋話『你會聽我哋講咩？你由細到大都唔聽㗎』所以決定離婚後最擔心就係點同爸爸講，我唔想令佢失望，覺得我冇用、任性，到我鼓起勇氣講嘅時候爸爸竟然話『你都算勁，捱咗兩年半，如果你半年唔夠就同我講可能未必會支持。』 亦因為有佢哋嘅支持我知道一定可以捱過。」雖然經歷失敗但她坦言仍對愛情有所憧憬：「始終我都係一個鍾意戀愛嘅女人，仍然希望會有自己嘅家庭同小朋友，唔會因為受過傷就驚咗，但一定會小心咗，懂得要聰明去愛。」
至於何謂聰明去愛？Jolie有以下一番見解：「我諗首先一定係揀返香港男仔先，以前可能覺得對方總之高大靚仔就咩都得，而家就要諗對方要踏實、有責任感同愛我，又要愛錫屋企。拍拖唔同結婚，講緊要圍繞住兩個家庭，我以前係任性衝動，所以見過鬼仲唔怕黑咩？但以前嗰個又真係鬼嚟㗎喎，哈哈！」外國月亮是否特別圓？相信無人能答，但起碼從Jolie口中可確定，外國男士普遍靚仔那怕吊兒郎當，至於港男，Well……都是努力工作賺夠錢買樓才可望脫貧脫毒！
採訪：曹家誠
------------------------------
【每周送10萬】
升級壹會員獨家尊享，立即參加10萬火急大抽獎!
*推廣生意的競賽牌照號碼：52302-9
-------------------------------
錶迷必讀！
89頁腕時計電子書 66款嚴選年度新錶
https://hk.adai.ly/e/v7jEA0MC1X
|
鍾意就快D Share啦！
|
|
|