39歲的葉璇於11年開始發展內地巿場，15年又公開戀上內地造型師小默先生，事業和愛情令她近年扎根於北京。
葉璇日前在尖沙嘴接受《蘋果》專訪，出道以來一直給人強勢感覺的她，不覺堅強女人不及柔弱女子被男人疼錫，快人快語的葉璇說：「我可以遇到仲強嘅男仔呀，更強男仔咪會保護我，咁我都可以保護番嗰啲弱不襟風嘅男仔，工作上我都有呢啲朋友。」不過拍拖對象，葉璇卻堅決跟另一半心智不相約：「太強、太弱一齊拍拖都冇共同語言，冇公平基礎係冇愛情可言，否則溝通唔到，兩個人愛情觀、世界觀要差唔多。」
自問有本事的葉璇，擇偶條件從沒列過要挑「富二代」：「我從來唔鍾意富二代，唔知你講『富二代』定義係點？富二代往往畀人感覺自己冇本事，要靠屋企，我只睇佢係咪有能力嘅人，我唔會介意佢係富一代定富二代，最緊要佢本人係咪獨立自主，係咪有知識、有修養同靚仔嚟。」葉璇原來必要揀靚仔做男友，她說：「乜有人鍾意醜樣咩？好肥、好瘦都唔健康，瘦到好似馬騮都唔順眼啦，健康陽光咪靚囉！」
葉璇覺得愛情是公平交易，「愛情唔係只搵對你好，一定要互相對大家好，冇人可以單方面付出愛情，我覺得愛情係公平交易，交易關心，交換愛護，互相欣賞。」葉璇與男友小默先生也是這個相處方法，兩人相戀4年，感情穩定，近年她被記者問得最多肯定是婚期，她笑言：「問咗好多次，但我唔介意再講多一次，結唔結婚有乜分別？呢一張紙只係保障一啲弱者，等佢哋離婚時可以有保障。如果大家不相伯仲就唔需要嗰張紙去證明啲乜嘢。一段平衡關係，唔係靠一張婚紙，而家離婚好容易。」葉璇近年跟小默先生的確少了有影皆雙，她說：「咁多年拍拖，我好少話帶男朋友出嚟，以前叫我去佢啲event宣傳，我會去，大家之間鍾意去就去，從來唔勉強。」
對於相處了4年的小默先生，葉璇讚他是10分（滿分）男友：「我梗係畀佢滿分，仲認定佢係長期做伴先可以繼續落去，但感情好難講，或者有一日，大家行到去分岔路口，需要分開行吓或平衡行，又或唔喺同一條線或兩個城巿都有可能。我覺得要隨緣，勉強亦強求唔嚟，相處要舒服、開心，鍾意就要全心全意去鍾意佢，到分開都唔好互相抱怨，大家有共同美好回憶就唔會有遺憾。大家冇欠大家，我又冇使你錢，你冇使我錢，我冇對唔住你，你又冇對唔住我，大家開心就一齊，如果覺得唔開心，大家咪輕輕放手，從來唔會畀對方束縛。」
有愛情滋潤的葉璇更專心發展演藝事業，她現在擁有自己的製作團隊，回想早年北上拍劇，她說：「20年前，我返去開工，飯盒得雞翼尖同兩條菜，好簡單，但人人都係咁，我都慣。而家拍劇，飯盒有四餸一湯好豐富，內地劇近年發展係快，但其實同香港差唔多，各有千秋。」葉璇99年代表美國紐約來港參選國際中華小姐奪冠軍入行，受到娘家無綫力捧，她累積了經驗和知名度才往外闖，打好的根基正好為她開拓內地巿場，葉璇坦言這一切為她在內地開工時換來不錯的待遇。葉璇在內地拍戲都擔正，劇組會遷就主角開工時間。葉璇說：「女仔瞓得少，拍出嚟唔靚，配角鏡頭前行過，唔會太介意佢有冇黑眼圈或殘啲，全係我喺香港累積咗知名度先有咁嘅優待。我平日夜晚10點就瞓，近年拍自己製作多，我可以安排自己少啲夜班，即使有都係7點拍到10點收工，唔會捱夜通頂，美容覺對女仔嚟講好重要。」
葉璇這幾年在內地賺人仔，豬籠入水，她認同大陸巿場大：「任何大巿場都會多機會，其實香港雖然係較細城巿，但機會都唔少，性價比高。」葉璇近年少接拍港產片，她否認放棄香港巿場：「唔係我想放棄，係香港冇乜電影拍，好多導演都去拍合拍片，演員跟住導演走。」
------------------------------
【每周送10萬】
升級壹會員獨家尊享，
立即參加
10萬火急大抽獎!
*推廣生意的競賽牌照號碼：52302-9
-------------------------------
錶迷必讀！
89頁腕時計電子書 66款嚴選年度新錶
https://hk.adai.ly/e/v7jEA0MC1X
撰文：比華利
攝影：沈健程
攝錄：葉君海
場地：六公館
化妝：Chris Lam
髮型：Ali
服裝：Ermanno Scervino
|
鍾意就快D Share啦！
|
|
|