單身7年的藝人陳煒日前承認有新戀情，與年輕約5歲、同是失婚的醫生陳國強譜姊弟戀，沒料報喜沒多久即有讀者爆料，指男方根本未離婚，鬧爆陳煒是「小三」！陳國強昨日得悉女友被屈即開腔護航，並Man爆隔空發表愛的宣言：「唔怕，有我喺度！」難怪氹得陳煒非常冧。
現年45歲的陳煒，自與台灣富商顏志行離婚後一直單身，緋聞欠奉，直至去年邂逅約40歲、有「大鼻郭晉安」之稱的醫生陳國強（Dr.Aldous Chan），由於雙方均失婚，很快就由朋友發展成情侶，早前陳煒被發現陪男友出埠工作，令戀情曝光，及後她大方承認剛開始拍拖，希望大眾給予空間，心情大靚的她更被本報拍得物色靚樓，似乎要準備嫁妝。
與前妻共同撫養兩女
不過公開戀情僅兩天，竟有人爆料指陳國強其實未離婚，還有兩名女兒，直斥陳煒是「小三」！本報昨日向男方求證，他即為女友發聲，否認未離婚之說，直言與陳煒開始拍拖時已回復單身：「陳煒都係聰明女，一定搞清關係先開始。」他指與前妻一年前離婚，並已辦妥手續，由於兩名女兒乃與前妻共同撫養，故雙方有見面：「前妻負責照顧，我負責經濟支援，兩個女都知我依家女朋友係陳煒。（佢哋對陳煒印象點？） 冇問，但都唔會討論，驚佢哋睇到新聞有壓力。」
尷尬急步閃
問到可擔心負面報道令陳煒不開心？他又Man爆說：「唔會，因為有我喺度！（知唔知爆料者身份？）其實都唔知係衝住我、定係陳煒而嚟，佢嘅目的不明，所以唔會理咁多。」而陳煒得知男友公開發表愛的宣言，當然心花怒放，甜到漏說：「陳醫生都回應咗，我都冇嘢補充！」
有愛情滋潤的陳煒心情靚靚，前晚聯同時裝設計師何國鉦，到尖沙咀的酒店與無綫高層樂易玲飯敍，同場還有樂易玲兩名兒子，直至晚上9時許，陳煒率先步出酒店，起初見到記者也面帶笑容，但當被追問新歡婚姻狀況時即表現尷尬，隨即急步行到座駕旁上車，未及記者問完問題便絕塵而去。
何國鉦戥「妹妹」開心
視陳煒為「妹妹」的設計師何國鉦（Dorian）前晚約她與無綫高層樂易玲食飯，席上當然有祝賀陳煒蜜運成功，Dorian表示：「席上好多人恭喜佢，我都識呢個男仔，大家食過一次飯，覺得佢好文靜，高大又斯文，仲講笑叫陳煒諗吓，但當時陳煒只話大家朋友食餐飯，真係未拍拖嘅，後來知佢哋拍拖，都唔愕然，佢哋好匹配！（覺得佢容光煥發？）其實佢又靚又體貼，入得廚房出得廳堂，如果咁都冇男友就天冇眼，所以佢有拍拖都戥佢開心，等佢哋順其自然發展」
樂易玲昨受訪更稱：「我都好希望有機會見到佢新男友，因為唔識、未見過，要等佢介紹！（蜜運中嘅陳煒特別開心同靚？） 佢一直都靚喎！」
更多新聞，請瀏覽東方日報網頁：
https://orientaldaily.on.cc/
|
鍾意就快D Share啦！
|
|
|