- 【6月最後公開露面】梁舜燕撐住癌病做義工 曾是汪阿姐儀態及化妝導師
- 2019-08-13
繼夏萍，又一位資深藝人離世。
曾在大台劇《真情》，演活「上等人」嘅資深藝員梁舜燕(原名:梁淑貞，人稱Lily姐)，於今日(13/8)在瑪麗醫院病逝，享年90歲。
原來病逝前兩個月仍撐住癌魔嘅折磨去做義工。據悉今年六月已身患重病嘅佢，為分散注意力，不惜苦撐身體參予義工活動，從助人中忘掉自己病痛嘅困擾。從相片中，打扮仍堅持一絲不苟，貫徹經典作「上等人」作風嘅Lily姐，將病容完全隱藏。估唔到昔日忍受喪子之痛繼續為《真情》開工嘅敬業精神，到病重時當義工同樣發揮專業態度。
有「上等人」之稱嘅佢，係庇理羅士女子中學畢業，出身有教養有學識，57年初入行時，加入麗的映聲任報幕員，又先後喺幾間電視台新聞部任主播，隨後轉為藝員。
因為說話嬌柔，儀態萬千，打扮向來一絲不苟，入電視台後Lily姐除參演劇集，同時亦係導師，負責指導訓練班學員儀態及化妝，佢嘅學生包括汪阿姐(汪明荃)。
去年佢嘅「閃爍藝壇六十載」派對中，以學生身份向Lily姐老師獻花嘅汪阿姐咁樣講:「當年老師教我化妝同儀態，又教我黐眼捷毛，儀態萬千，持家有道，所以佢喺我眼中係真女人典範。」
演藝生涯半世紀，做到九十歲嘅佢(最後遺作係未出街嘅《唐人街》)，原來一直有未圓嘅心願，就係歌星夢。慈祥婆婆、刻薄闊太都演活過，有把好嗓子嘅佢，好想喺劇集中一展歌喉。佢曾經喺慶祝入行六十年派對上，開口向大台高層杜之克講:「我一直好想做歌手，希望杜生之後安排我演歌星。」
如今與世長辭，雖然觀眾未能一聽Lily姐美妙嘅歌聲，但佢雍容華貴嘅形象與演技，長留觀眾心。Lily姐，一路好走。
來源 source: http://nextplus.nextmedia.com
|
鍾意就快D Share啦！
|
|
|