新一年的港姐即將誕生，近年港姐們的出路，入了一個倒模程式，選完的下一站就在大台拍劇做演員，而有「非一般港姐」之稱的鄭文雅（Olivia）於79年獲選，今年剛好是40周年，當年的她當選後比現在的港姐發展豐富得多，由跳高運動員、高爾夫球手、拍戲、攝影師、陶瓷到近年鑽研的書畫藝術，愛挑戰自己，越陌生的事物就越去嘗試。如幾年前，她叩門拜師學金石篆刻，日前還與老師同學們開藝術展覽，多了一個新的身份，就是篆刻雕塑家。
Olivia明年將會59+1，邁向「登六」之齡，回帶認識她的第一步，必定是「香港小姐」，她笑言：「好似選美嘅時候喺唔係好耐，跟住就40年，我覺得選唔選美都唔緊要，每一個人都要善用自己嘅時間，因為時間快得驚人，唔可以浪費時間，選美係好特別嘅人生經驗，不過之後嘅人生路點走，選美係話唔到畀你聽，好多人選完美後，都各自有自己唔同嘅生活。」在新界長大的她，因選美第一次去申請護照，第一次出遠門，去了澳洲珀斯參選環球小姐：「對我嚟講係一個好奇妙嘅旅程、係旅行嘅開始，之後去咗全世界唔同地方，我實在太鍾意旅行，所以拎住相機不斷去旅行。」
在選美之前，Olivia是一個跳高運動員，某程度已訓練到有種克服的個性，她說：「未選美之前，我係一個運動員，作為一個跳高運動員，首先要克服咗支杆，支杆離遠好高，畀咗好大心理障礙，要同自己講一定要得先跳得過，冇得撞彩，縮吓縮吓驚，跳高畀我嘅係，未做一樣嘢之前都要有百分之一百信心去面對，唔可以退縮，選美我係採取同一個策略，冇諗過自己得，但要做得最好。」
人生盛年時，她用了10年時間去拍戲，經歷香港電影80年代的黃金時代，香港金像獎的獎座更是以她的身形線條而來：「拍電影係一個集體創作藝術，學到好多嘢，好似藝術展點樣擺得好啲，可能係片場學返嚟。好鍾意拍新藝城嘅電影，嗰時係喜劇嘅時代，拍戲過程好開心，好多新晉導演想拍好部電影，嗰時電影好收得，好好彩喺香港電影最蓬勃開始，好開心識咗阿倫、志偉、Sam、許冠文，同麥嘉、黃百鳴同施南生，呢班人對香港電影界好有貢獻。」
近年的選美已被批評沒代表性，作為大師姐的她表示成個包裝已不一樣：「以前選完係代表香港旅遊協會去介紹呢個小地方，係有個mission喺度，而家係選完好似一個藝員，整體性唔同咗，唔可以話而家唔啱，係時代唔同咗，香港已經出名到唔需要出去再宣傳。」仍會鼓勵女仔參加香港小姐選美嗎？她笑言：「如果唔係好知道自己想做乜，去參加選美都幾好，因循住自己條路去做，我細個都唔知自己想做乜，宗維賡叫我選美，我咪去選美，始終有一個機會去參與吓係冇壞。」
由運動員到選美，到藝術工作者，對她來說都是一個學習過程：「咁多樣嘢，都係有個共通點，必須要練返嚟，冇諗過有shortcut，拍戲都係，要練返嚟，要人生經驗，藝術同運動都係要經驗，係唔停得一個練字，細個有教練叫你點練點練，大個咗係要有自覺性、激情，要對藝術有追求，要有一個高度畀自己去達到，我對於自己要求好高，要求高係冇用，都係要練。一個人喺練習過程裏面去克服到最孤獨，打高爾夫球係一個人對付天時地利環境，寫一幅字可能寫幾日你自己對住啲字，係好孤單，自我陶醉，呢個過程你一定要克服到就得。」
成就今日的鄭文雅，除了自我要求高，她表示要多謝結婚28年的老公虞哲輝，她笑言：「唔好（話）作為港姐，作為一個香港人，自己做嘅嘢係各方面都做咗好多，尤其是作為一個結咗婚嘅女人，我好好彩，老公好支持我而家做嘅所有事情，唔需要我去做買餸煮飯嘅家庭主婦，佢畀好多時間我做自己鍾意嘅嘢，唔係佢，唔會有今日嘅我，打golf、書法、篆刻都係我結婚之後先做，身邊嗰人要好體恤我、體諒我先得，畀咗一個好穩定嘅心靈我。」
明年就是她踏入60歲的日子，她表示沒有年齡關口，更做了一個甲子篆刻畫鼓勵自己活得健康自在：「最緊要你做好內涵，年歲絕對唔係一個問題，你大咗一年，學到嘅嘢更多，好似我係一個教師，教緊人高爾夫球，但喺我身邊有6個老師教緊我，我亦都係一個學生，我覺得我係好幸福。」問到她養生扮靚貼士，笑言自己是懶人靠瞓得夠：「我係新界人，最好嘅養生就係跟住太陽嘅日出日落作息，去到我哋呢個年紀，唔好講外表，講係唔係健康先，因為健康最緊要，唔係點做咁多嘢。」
前幾年，她媽媽與外婆都發現有腦退化症，會否有心理準備發生在自己身上？她說：「我keep住學嘢做嘢，腦筋不停運用，我唔會因為遺傳呢樣嘢乜都唔做，反而會學多啲，做多啲。已經一早同老公講，唔記得嘢唔好怪我，好似我媽咪70幾歲發現，佢自己唔知，係我哋作為仔女先覺得。我而家唔係唔記得，係我選擇性地唔記得，因為個腦要記好多嘢，人選擇性唔記得係好，唔好乜嘢都記住，呢樣係好好。」對於「登六」，會否有計劃想做的事？她簡單地說：「太過虛無嘅嘢我捉唔住，每日做好嘅小事情，已經有小成功感，儲埋儲埋就有大成功，做人唔好諗太多。」
採訪：梁錦雯
攝影：周樂恒
攝錄：林德雄
-----------------------------
【撐學生】
召集有心人 撐學生全年睇《蘋果》
立即按此
| （左圖攝影：周樂恒） | | |
| | | |
| | | |
| | | |
| | | |
| | |
|
鍾意就快D Share啦！
|
|
|
