一連兩場的關智斌（Kenny）首個紅館處男演唱會《KENNY is BORN 關智斌演唱會》，昨晚於紅館舉行，全場爆滿。
Kenny以全白西裝表演色士風獻唱《分手不要太悲哀》後，唱出《情陷百老匯》，此時全黑打扮的密友張敬軒以鋼琴伴奏，Kenny倚琴合唱，兩人一黑一白，非常合襯。軒仔的出現，更令全場陷入瘋狂。
軒仔說：「歡迎大家嚟到相敬如斌演唱會，呢個年代上網講下就有㗎啦，係呢，我哋係咪應該攬下㗎？」兩人明顯有點尷尬，只是蜻蜓點水式互相抱抱。軒仔很開心成為Kenny個唱的嘉賓，Kenny說：「我其實都有啲嘢想講，平時你講嘢我都冇得講㗎嘛。」軒仔即煞有介事說：「咩平時呀？」然後又一面正經，大讚Kenny付出了很多，今天這個紅館演唱會是他應得的。說罷，歌迷又再度起哄，軒仔沒好氣地說：「都唔知你哋嗌乜，睇波咩而家？」台下觀眾即大叫「咀嘴」、「結婚」，但是由於太哄動，兩人聽不到台下呼召，於是繼續兩人對談。
軒仔又笑指Kenny向來節儉：「我哋做嘉賓呢，老毛都冇一封㗎嘛，平時都有燒肉、生果喺房，今日乜都冇。」Kenny一面茫茫反問他：「乜唔係你安排咩？」全場再度起哄，軒仔緊張澄清不是他負責，又搞笑說：「有鬼呀呢個台，鬼拍後尾枕。」
軒仔逐叫工作人員帶來巨型果籃，他隨手拿起寫有KK的支裝煉奶：「Kenny Kwan呀嘛，好彩你唔係姓容咋，嗱，你哋識笑嗰啲全部都心邪呀。」他又準備了火龍果，語帶相關地說：「火龍果，好似我咁有益呀，食咗就。」全場又再一次瘋狂歡呼。
兩人後來合唱《笑忘書》，期間他們齊齊眼濕濕，唱畢後更緊緊擁抱。張敬軒感觸表示Kenny北上發展時，面對了很多困難：「作為喺佢身邊嘅，我覺得佢係玩命嘅，佢同容祖兒一樣都係攞條命嚟較飛。人生有好多愛係可以不斷昇華嘅，好似今晚咁，大家將呢份愛化做對Kenny嘅支持。」
Kenny又換上珍珠閃閃套裝獻唱《代表作》，他說：「其實BOYZ只係成立咗兩年，跟住我哋就拆咗夥各自發展，公司對我好好，揾咗阿Y（黃偉文）幫我填咗呢首歌嘅歌詞，呢首歌係我到而家為止最後一首廣東歌。」Kenny自言知道自己天資有限，但今晚已經盡了全力：「我一直以為人生係加法，不停追求想要嘅嘢，但因為呢個騷，我喺度諗人生會唔會其實係一種減法呢？減去咗我嘅青春，我嘅笑容、同你共同拼命嘅隊友，當仲有人好好喺你身邊支持你嘅時候，你一定要好好珍惜，所以今晚我一定永世難忘。」接着唱出張敬軒為他作曲的《預言書》，其間終於忍不住流下男兒淚。
Encore期間，Kenny主動重提拍檔張致恒（Steven）：「呢個本來係BOYZ嘅演唱會，發生嗰件事，好多人問我有冇嬲？其實我係失望多啲，Steven第二日已經打咗畀我，好鄭重咁同我道咗歉，嗰刻我已經冇嬲。我好擔心佢，唔知佢點面對日後生活，我唔係想叫大家原諒佢，亦未必好適合由我嚟講值唔值得原諒。佢係我出生入死嘅好兄弟，大家一齊住一齊玩，當中好多汗水、淚水，都只係我哋先體會到，經歷埋呢兩個月嘅事，我更加感觸，亦有少少遺憾，但係我都想用我寫畀BOYZ嘅呢首歌《大男孩》作為最後一首歌。」全場大合唱，場面感人。
採訪：盧妹
攝影：陳俊強
|
鍾意就快D Share啦！
|
|
|
