【娛樂人物】現年57歲的楊瑞麟在1987年參加《全能司儀選拔大賽》撼贏黃子華，奪冠後加入無綫，主持過不少節目，更一度被點名為金牌司儀接班人。在無綫打滾32年的楊瑞麟，近年密密轉型拍劇做演員，但可發揮的角色卻少之又少，上月他突然在毫無先兆下離開無綫，只為了重啟自己的人生。
撰文：唐琛悠
攝影：沈健程
相關新聞：自覺付出難及子華
楊瑞麟日前在尖沙嘴接受《蘋果》訪問，談到人到中年才大膽離巢，他笑說：「其實時間都差唔多，由當年參加司儀比賽到𠵱家，差唔多32年，坦白講我係好鍾意拍劇，但係仲會唔會有呢啲機會，可以拍到一個自己滿意又鍾意嘅角色呢？當呢個角色完咗，又會唔會有其他機會呢？我係一個唔識頴撈嘅人，就算去頴，監製唔會畀啲唔好嘅角色，但亦唔會係滿足過戲癮嘅角色。」
| | |
公司環境變咗
楊瑞麟坦言公司環境轉變，多了限制：「呢幾年做好多網絡上面嘅嘢，好似OTT轉播，呢啲新嘢公司會搵啲後生、當時得令，又配合到產品層面嘅藝人幫手，冇可能搵我哋6、70歲，所以不如停一停。雖然出面環境唔理想，我亦冇期待，但我有個信念，係你就係你。」他坦言離巢不代表與無綫關係中斷：「我同TVB只係暫停關係，難保將來佢會搵我做嘢，公司只要覺得你值，任何嘢都會發生，我唔覺得因為合約會影響最終嘅決定，如果最後公司冇搵咪接受囉。我心態好自在，如果公司覺得我值錢，有角色啱我做，隨時可以搵我。」
相關新聞：【蘋聞重溫】李家聲心淡移民
曾因宗教問題拒絕主持風水環節而遭雪藏，楊瑞麟近年密密轉型拍劇，他自言愛上演戲，希望可以繼續滿足這興趣︰「有飯食已經好安樂，頭嗰十年覺得做主持OK，久唔久客串拍劇，呢十年間突然好鍾意演藝呢個藝術，體會深咗，原來呢啲先叫做戲，本來係零分，𠵱家40零分，仲有空間進步。」32年的娛圈生涯，楊瑞麟拍了近140套劇集，大多數角色沒有很大發揮空間，會否因未有代表作覺得不完美？他說：「人生有好多唔完美，尤其演藝行業，只有極少嘅人有代表作。對我嚟講，有幾個角色享受到，得到大家認同已經好滿足。其實都要感恩，因為生活仲可以有選擇，呢樣唔係必然，唔係每個人都搵到足夠金錢又可以做想做嘅工作。」
會為自己發聲
楊瑞麟更笑指自己不貪心，才決定離巢：「如果擔心冇飯開，我諗唔可以有呢個決定，所謂大樹好遮蔭，唔好講話有冇機會，喺棵樹下個人真係安心，但我選擇脫離現狀，將來唔知會點，客觀睇唔理想，咪即管睇吓點，我同朋友傾偈，了解𠵱家嘅狀態，都知唔會好，但依然有人開劇集，輪唔輪到我，唔講喇，不過我都叻咗，我一向唔鍾意拍膊頭，但我都會話：『明白，如果啱就搵我喇！』」他坦言離巢後要重整自己的人生觀去爭取機會：「以前唔講呢啲勉強可以，因為仲有好多機會。但𠵱家唔講，遲吓就冇機會再講，我行咗出嚟，唔出聲唔會有人知，所以要畀人知道你嘅狀態，我會開放少少，嘗試話畀人知自己係available，我都會喺教會分享自己體驗，做吓義工。工作𠵱家冇諗，但當然希望有機會繼續拍嘢。」
場地提供：鉄板燒海賀（The ONE）
|
鍾意就快D Share啦！
|
|
|