46歲的葉蘊儀勁減36磅拍半裸寫真，一洗2014年《女人俱樂部》內的「肥菜」形象。從一代玉女變師奶，再從師奶變回美魔女，正如她的過山車人生。22歲最紅的時候息影閃婚，五年後經歷離婚，作為單親母親，多年來都為一對子女而活，甚至放棄再婚的機會。時光飛逝，子女長大了，她突然醒覺要為自己活多次，想在「入五」前創造更豐盛的人生。
撰文︰祖李
攝影︰馬太林
相關新聞：減磅後依然包冚
葉蘊儀13歲入行，出道幾年已紅遍港、台、日、韓，雖然年紀小小就在娛樂圈打滾，但父母很放心，皆因自己是宅女，就算做了明星，工作完了便返家，謝絕夜蒲︰「當時我只覺得呢行好好玩、幾得意，咪睇我外表嬌滴滴，好需要保護，其實由細到大我都好獨立、有主見，大部份事情都係自己揸主意。」可有後悔當年放棄如日方中的事業閃婚？她說︰「我做人從來唔後悔，因為我本來就好任性，鍾意做就做，所以唔會覺得放棄事業好可惜。所謂嘅任性都係大人眼中咁評論，對我嚟講只係隨心而發。」
| | |
離婚後曾拍拖
有傳丈夫陳柏浩當年因破產，沒給贍養費，一人獨力養子女是否很吃力？葉蘊儀說︰「坊間嘅傳聞唔可以盡信，我唔想一路澄清，喺香港地，睇吓你對金錢嘅睇法箒，我覺得足夠就OK。我對物質追求唔多，細個嗰陣我成日買名牌，一身都係貴嘢，呢啲嘢我以前擁有過，我好清楚自己唔係要呢啲。」離婚後葉蘊儀曾與一個比她年長十年的男子拍拖，但埋門一腳卻無疾而終，皆因她不想結婚︰「我唔想影響小朋友，到咗談婚論嫁時難免牽涉到細路仔，因為要一齊住，我覺得冇咁嘅必要，所以最後都冇選擇到。因為我係佢哋榜樣，佢哋會跟住你模式做人，我唔想對佢哋心理有影響。」現在依然憧憬愛情，有年輕她十年的追求者，自己也不抗拒姊弟戀︰「𠵱家搵個伴最緊要啱傾，年齡冇所謂，溝通到至重要。」
相關新聞：與髮型師傳緋聞
事業少年得志
離婚後葉蘊儀先後客串過台灣電視劇及一些電影，並無全面復出，因怕子女被傳媒追訪︰「嗰陣驚全情投入拍嘢會疏忽佢哋，作為單親媽媽，照顧小朋友係我責任，我會放第一位。我更加唔想狗仔隊影我嗰陣，連細路都影埋，對佢哋好唔公平，我唔想因為自己工作影響到佢哋。」她沒告訴子女自己曾是明星，就算同學家長告訴子女，他們回來問，她也只會輕描淡寫不會多講半句。葉蘊儀的兒子今年23歲，讀電腦，19歲的細女也上了大學讀獸醫，子女學業有成，葉蘊儀坦言有失落、空虛感，但卻引發另一種動力，因而年初已蠢蠢欲動想拍寫真留個紀念，但她想減到滿意才拍，所以拖了大半年才實行，更早已知會了一對寶貝子女。尚有四年入「五」，葉蘊儀說希望人生更豐富，隨心所欲地生活︰「我係過來人，事業上少年得志，又早婚早生BB兼離婚，三十歲前已經完成晒其他人嘅一生，有些想法想同其他女性分享。」
作為父母，葉蘊儀認為開明及溝通很重要，她自稱是嚴母，但對子女卻採開放態度︰「我哋無所不談，但我個人着重同佢哋討論、分析。」她並非怪獸家長，從不安排一大堆的學習班︰「我好open，鍾意就學，唔鍾意咪唔好學，我嚟講，識就得，例如要學游水，原因係遇溺都識游吖，其他運動，識少少可以幫助你社交，所以學嘢得兩個目的，係求生同社交。」
場地提供︰Spring Medical
化妝：Krisie Wong
髮型：Daniel
首飾提供：帝后 My Queen Diamond
|
鍾意就快D Share啦！
|
|
|
