王宗堯堅持幫襯黃店，訪問當日，就一口氣在銅鑼灣「懲罰」了三間黃店，篤魚蛋、喝果茶和食茶餐廳，雖然不是甚麼米芝蓮推介，勝在食物有人情味，王宗堯吃得好滿足，他更在飲品店的連儂牆寫下「自由香港」的memo貼上。
王宗堯是譚小環的渣哥常客，邊篤魚蛋和腸粉，邊說：「有良心喺裏邊特別好味，𠵱家香港人有骨氣程度係好令人佩服，尤其近日NBA風波，好多香港人將日常生活、衣食住行、坐車等生活習慣都改咗。」近期近乎零收入的王宗堯可擔心花光積蓄？他說：「我個人好慳，我多數幫襯地道小店，篤串魚蛋，偶爾係會同朋友出去食飯，但都唔大使，我好少食米芝蓮壽司，某程度上，我女朋友（蘇皓兒）跟住我係咪捱苦，但佢都冇所謂。平日有限度花費，我儲落嚿錢都捱得住，我都有做少少理財投資，老竇送我去外國讀書，讀經濟都唔係冇用。慶幸我都冇包袱，唔使養屋企。」王宗堯表示金錢一定要花在值得的地方，「香港人𠵱家好清楚值唔值，唔係用金錢衡量，有好多價值遠遠超乎金錢價值。」
相關新聞：【娛樂人物】王宗堯不跪低
揦鮓手段
途經不停爆警民衝突的電車路上，王宗堯不無感慨，尤其8月11日晚上，銅鑼灣出現有飛虎隊假扮示威者拉人，原來他同一時間身處附近派物資，跟便衣擦身而過。這幾個月持續發生的一切，王宗堯沉重說：「好攰，成日用『揦鮓』手段保住建制，我都有無力感，不過如果𠵱家放棄，就同五年前一樣，佔中時係有一啲地方做得唔好，有開嘉年華，日前有人喺太子花壇前切蛋糕，立即被譴責，今次大家會自我檢討。」王宗堯也不屑「撕紙狗」惡行，看到銅鑼灣天橋上的連儂牆，文宣被撕掉變成垃圾，他說：「有某部份人唔鍾意呢啲街頭佈置藝術，佢哋破壞咗，又掉到周地垃圾，但連儂精神係你破壞，我哋有機會會再整返靚佢。」撕一貼百，有機會王宗堯會出力修復。
|
鍾意就快D Share啦！
|
|
|