掃呢頁CODE去手機

2019年10月29日 星期二

【逆市擴張】吳日言派傳單救亡 飯糰店幾百元生意額蝕入肉 __,吳日言,

香港抗爭之戰已長達4個多月,巿民對催淚彈習以為常,尤其旺角區一帶更是重災區,商戶民居首當其衝。吳日言(Yan)投資7位數飯糰分店日前在抗暴中開業,受社 ...


香港抗爭之戰已長達4個多月,巿民對催淚彈習以為常,尤其旺角區一帶更是重災區,商戶民居首當其衝。吳日言(Yan)投資7位數飯糰分店日前在抗暴中開業,受社會氣氛及交通影響生意大跌蝕入肉。在煙火中吳日言與大家同行無懼食催淚彈,知道自己是有良知的人,日前更親自踩落旺角街頭派傳單宣傳新店,走到一群傳單姐姐中爭食,明顯功力不足勁食檸檬扁晒嘴,但香港地到處總有愛,姐姐群起鼓勵叫Yan要派得勤力,Yan在此情此景下未受打擊,並笑說:「呢度每日起碼10個姐姐派傳單,佢哋好努力,唔好話佢哋知唔知我乜水,啲人望都冇望我一眼,所以要宣傳都要諗吓計。」



選址在旺角扑槌 開舖早在半年前決定,Yan坦言:「做生意感受到成個社會氣氛同生意額上風險,地點近地鐵站口,試過鐵路唔開,商場突然要拉閘關門,好多嘢預計唔到,裝修時管理員通知或者會突然拉閘,自己雖然唔喺舖,但都感受到嗰種下一秒唔知發生乜事,同埋地鐵站口叮噹聲一響就突然又咩事呢?做老闆都好擔心員工安危。」交通問題直接令生意額大跌,Yan只能無奈表示:「拉閘就更加啦,可以返去瞓覺,唔係點呀?唉…呢段時間好艱難。」生意持續創新低,每日都入不敷支,Yan說︰「試過最低收入得幾百元,暫時睇盤數每日生意額都交唔到租。」在如今政局下跟大眾一樣處於捱打狀態,她慨嘆︰「希望業主減租,都想問吓李嘉誠捐出嗰10億基金幫助中小企係點申請。開舖有一定貨錢、人工、舖租、有基本開支,但唔減租商場要拉閘又冇人來,舖頭開唔到,都唔係健康事。」Yan用盡辦法為舖頭開源節流,親自落場執貨和老公充當物流運輸,甚至連店內的價錢牌都是DIY,慳得就慳,願意和員工共渡時艱做個良心老闆。



旺角成為食催淚彈高危地,Yan和時下年輕人一樣無懼白色恐怖,她說:「怕唔怕?唔怕,覺得食咪食囉,你夠膽喺我呢度放,咁我可以做啲咩呀?要食咪大家一齊食囉。係無辜呀,但我咁算唔算係工作期間?我可唔可以帶個豬嘴吖?工作期間你喺我面前放有呢個需要喎,講起都嬲……」並透露老公亦曾食過催淚彈,她說:「唔好話企正舖頭門口或屋企附近,其實好遠都飄到味道或澀眼,你嗰日眼晴苦澀就係食咗催淚彈。」店舖會否做學生優惠支持大家?她說:「我自己幫舖頭做咗好多嘢,我唔能夠代表舖頭,有其他股東,我知自己係一個有良知嘅人。」



採訪、攝影:卓寶花

DV片段:馮嘉銘



-----------------------------



-----------------------------





 吳日言的飯糰店開分店,要親自落區派傳單。 吳日言的飯糰店開分店,要親自落區派傳單。
雖然落力派傳單,不過成績麻麻。

雖然落力派傳單,不過成績麻麻。
 旺角區分店入不敷支,吳日言與老公用住方法開源節流。

旺角區分店入不敷支,吳日言與老公用住方法開源節流。
有時社會混亂,雖然日不在店舖,但仍會擔心員工安全。

有時社會混亂,雖然日不在店舖,但仍會擔心員工安全。
如果商場拉閘,吳日言說:「可以返去瞓覺,唔係點呀?」

如果商場拉閘,吳日言說:「可以返去瞓覺,唔係點呀?」

鍾意就快D Share啦!