「保齡球大王」楊氏家族旗下高譽投資發展的土瓜灣翰畋交樓，買入一個高層單位的鍾氏夫婦都是貪市區樓、校網佳，但樓盤是小型發展商發展首個單幢住宅項目，收樓前都抱住未知「是驚還是喜」的心態。最終在資深驗樓師詹濟南「詹sir」手上，15項工種有4項捧蛋，瓷磚多崩花、油漆差，甚至有處3呎長乘4吋闊「撲」批盪，最令業主擔心是比一個人還要高的落地玻璃窗需要整塊更換，得分51分。
詹sir認為，小型發展商發展項目不同大型發展商般長做長有，難以控制判頭質素，某程度是提供一次性服務後拍籮柚就走，今次單位得分算是不過不失。
業主鍾氏夫婦是中產人士，丈夫是教師，太太從事金融業，幾年前沽出沙田中心1個單位賺100多萬元後，欲轉投市區樓。2年前適逢「保齡球大王」楊氏家族旗下高譽投資發展的土瓜灣單幢樓翰畋，鍾太說：「偶遇，驚定喜未知。見近地鐵，又位處市區。當時由1間代理行獨家銷售，咁去睇下，睇完覺得幾好。全個盤約90個單位，嗰時已經賣緊第2輪，仲加咗價。
睇好沙中線同啟德發展，仲有校網，呢度屬九龍城校網，自己計劃生小朋友，可以自住或放租，如果放租始終會搵到租客。」鍾太說經紀有跟他們簡介發展商，「係保齡球大王，起啲咩飛鵝山別墅，我諗每一間細發展商都有成長嘅過程，就畀一次機會佢。」2017年遂以逾800萬元買入翰畋高層1房單位，實用358方呎，呎價逾2.26萬元。
沒料到同年底新地（016）推出同區新盤Downtown 38，首批折實均價17,288元，比起翰畋平逾2成，她呻笨。收樓原本預計今年6月，遲到10月才得手，「沙中線都話今年6月通車，但而家已經無人預計得到」，「既然錯有錯着，不如正面啲開心啲！」收樓後，「經紀同我單位講向東南，點知收咗原來發現向東北。」惟有阿Q地認為：「咁行出露台都可以望到東南嘅。」至於交樓質素最關注窗戶情況，「買樓嗰陣，經紀同我哋講，呢個落地大玻璃，但我哋擔心唔夠堅固，會造成安全問題。」
幫鍾氏夫婦驗樓是詹sir，入屋就覺大門旁邊組合櫃放置洗衣機古靈精怪，詹sir稱：「香港地盡其用，有窿罅，塞得就塞。」啟動洗衣機，聽到機器震動聲，卻沒有入水，相信水掣未開。尋找水掣在何處，打開相連的上組櫃，拆開兩層層板，揭開電錶櫃門，再打開生口板，麻麻煩煩終於找到洗衣機來水掣開關，「咦！有啲垃圾，仲有……」他伸手取出口罩後謂：「嘩！違法品。」
轉入廁所，詹sir行向廁所窗，「掃口粗糙，呢啲窗，遠距離勉強可以接受，近距離見窗真係覺得唔好睇喇，咁鬼粗。順滑幾時都好過粗暴，夾硬嚟，唔好睇。唔會滲水，係唔好睇。」轉身擰開企缸花灑，發現水龍頭「T」字位漏水，「扯！扭唔實嘅，呢度（水龍頭與水喉接駁位漏水）多過花灑頭出嘅水，應該走咗雞，漏咗塊膠皮。」隔籬是全屋唯一睡房，他在牆身連環貼上黃色memo紙猶如貼連儂牆，「咩貼連儂牆呀，貼連儂牆會被人斬㗎，你想我死呀！係牆身污糟咗、黑咗、花咗！」轉身敲近腳線牆身，「嘩！手都敲得響，唔係假，面積都幾大，3呎長乘4吋闊。近地腳位，有時批盪前索咗啲水上牆，抹得唔清，就成日都會「撲」。不過呢啲位唔使擔心，起碼十年先剝落。」
行出露台，俯瞰啟德，望維港，詹sir按捺不住：「晚星墜落，都唔會徬徨午夜。如果黎明來到，一定一片美景……咦！遠處吹來號角聲」，眼眉一睄露台趟門路軌，着令徒弟康仔：「be water！」，意指想要桶水，「我估條軌藏水，啲水唔識流出去。」的確water can flow，而現場water在塞，詹sir指：「有時有啲野唔可以困死，要疏導，得個丁屎咁大個窿，係疏導唔到，通常去水窿會大啲。」如果日後下大雨未至於入屋，但有機會藏水，建議鑿大去水窿嗎？他不建議，免得越整越衰。
驗樓工種15項，4項零分包括鋪磚、油漆、地板及窗，詹sir總結：「呢個盤好過同區津匯，分數差廿零分。作為小型發展商，比起成熟發展商，仲有一段距離。其實小型發展商好蝕底，因為好多判頭做完呢個項目，再無生意往來。唔同大型發展商，不停有生意接，判頭要顧及往後生意。」如果評論這個樓盤交樓質素他說是「不過不失」。
聽完詹sir評論，鍾太回應：「不過不失囉，但都好過對面津匯。其實預咗，始終發展商唔係大品牌，執漏係預計之內。睇咗，叫發展商整返，一切問題迎刃而解，呢51分都係好值得。」她續稱：「聽到詹sir話客廳落地玻璃窗出現崩花要整塊更換。聽到個心都離一離，要成塊換？因為話有個窿，一定要換。但我都有啲擔心換唔換到，因為要用吊船，塊玻璃仲高過1個人。」
記者：陳家雄
攝影：細釗
|
鍾意就快D Share啦！
|
|
|
