梁栢堅受訪時自嘲是廢中，連登都懶得上，他說：「好多人話我係連登仔，我唔係囉，我會睇嘅，我其實好懶post嘢，連登太快，我不如用真account post Ig，我又冇讀書又冇做嘢，一起身就上網，上到臨瞓覺，上晒網癮。」30歲轉行填詞的他最愛這份工，因為夜晚蒲完，第二天不用早起返工，以前玩世不恭的他，身處亂世惟有藉二創抗爭歌，幫大家苦中作樂。他說：「我本身個人低能，低能嘅人係冇目的，開心當賺咗，大家咁唔開心，如果大家有反應，令你舒服啲，已經係免費娛樂。」
| | |
問梁栢堅身邊有沒有朋友站出來抗爭？他飲着雨傘紅酒笑說：「拉晒咁講啫，抗爭唔一定用行動，可能文宣，一個短訊一張海報一份改詞一張改圖，可能令某啲嘢發生。」早前網上有一對抗爭情侶，戴着黑色口罩深情對望相擁的相片，梁栢堅借用張國榮《今生今世》的歌詞改成：「願意今生約定，煲底再擁抱」，他透露是在飲醉下寫的：「覺得嗰句幾正，之後有人用咗貼落葵芳連儂牆嗰度，可以煲底再擁抱同飲酒係好嘢。」
零工作不怕封殺
抗爭運動改變了很多人，梁栢堅說：「有時瞓唔着飲多少少，頂唔順你可以點，唯一可以令自己快啲瞓着咪飲吓嘢。」如何為這場運動盡一分力？他說：「我呢啲廢中，成日喺度指指點點，嘆少啲冷氣，出少句聲就最好。」黃到出汁的梁栢堅，仍有人搵他填詞嗎？他說：「搵我填海就有，X你老味，填乜詞。兩樣嘢，冇乜受影響，我本身冇工作，係零，本身少產量，呢排係全世界都少咗嘢做，電影同音樂都係，我有第二度嘢做，改詞囉，改詞冇收入，但係一個練習，幫個腦run緊。」
有害怕過被拉嗎？梁栢堅說：「以言入罪，甚至冇講任何嘢，企喺度樣衰都得罪佢，咁你拉我囉。」他笑言現在除了山頂區，每區都有機會被警察圍。家住港島區的他有否落樓鬧警察，他諷刺說：「我唔鬧㗎，我讚好警察，但未搵到。有次見到佢攞住支槍，但嗰度冇人，醉醉哋咁啱經過，對住槍管影shot，跟住諗番我都幾黐線，如果佢手指扣歪，我兜頭爆咗，飲醉酒行街係好得意。」
場地提供：心燒食堂
|
鍾意就快D Share啦！
|
|
|