今次主角，是艾威所養的一隻伯恩山犬，名叫Sashimi，雄性，兩歲有多。
在養Sashimi之前，艾威本來打算養兩隻伯恩山犬的，一男一女有個伴又可以為牠們傳宗接代，連名字都一早想好，一隻是Sashimi，另一隻是Sushi，讓人一聽名字就知牠們是一對的。不過，艾威最後打消了這個念頭，他解釋：「Sashimi係我朋友幫手搵返嚟，點知搵咗一隻返嚟之後先發覺……嘩，頂唔順！非常之充滿活力，唔知點搞至好。咁就死喇，一隻都可能搞唔掂。於是乎養住一隻先，可能遲啲先有隻Sushi啦。不過，而家養咗兩年幾就暫時……Sushi可能未必係佢女朋友，可能係佢囝囝喇，第時生一隻可能叫Sushi，跟住再生一隻叫Wasabi，跟住就Toro。」
Sashimi走在街上不時被讚「靚仔」，好像發哥出巡般不時被集郵，想要認識女朋友兼生兒育女，其實難度不大，艾威說有狗女很喜歡Sashimi的，況且Sashimi又會主動撩其他狗女，特別是已有男朋友的狗女：「嗰次去朋友屋企，十幾隻全部狗女，有一隻情深款款成日望住佢，佢總係唔理人哋。然後另一隻後生啲，佢就成日昅住人哋想撩人玩。佢鍾意撩人哋女朋友，如果有一男一女嘅狗，公嗰隻多數唔鍾意佢，佢可能靚仔呀。通常一男一女，公嘅會兇佢，母嘅會叫隻公唔好兇佢咁樣。」
按理說，Sashimi要找到伴侶生一窩小狗不難，但主人艾威較為傾向「門當戶對」，即希望能誕下純種伯恩山：「如果唔生隻同佢一模一樣好似好怪，因為係為咗紀念佢吖嘛。」比起貴婦犬、柴犬、金毛尋回犬等等，伯恩山犬在香港好像不算常見。慶幸的是，Sashimi活動範圍內就曾出現過雌性的伯恩山，艾威說：「佢試過有個女朋友，喺過兩間屋，後尾搬咗去澳洲……」還有一隻雌性伯恩山名叫毛毛，可惜毛毛很怕Sashimi，十劃想有一撇都難。「嗰隻好搞笑，好驚Sashimi。試過有次喺一間寵物美容店，職員同我講咁啱又有隻伯恩山嚟咗，原來就係毛毛。我話我帶埋Sashimi嚟，毛毛一聽到Sashimi嘅名，即刻調頭走咗去呀！」艾威笑說。
換言之，Sashimi仍是單身狗一隻，學艾威話齋：「順其自然啦，緣份到自然有。」又或者，如果大家對伯恩山有興趣，不妨考慮跟Sashimi做個朋友交流一下(特別是女的)。艾威說不難養的：
「(性格。)非常之善良，就算有人欺負佢，佢都唔會好兇惡。如果人哋惡，佢會退。
(難打理、易有皮膚病？)皮膚病通常因為濕，畀佢保持乾爽就OK。我屋企都要開冷氣，但用比較慳電冷氣機，咁電費就唔係啲咩負擔。其實佢啲毛睇落好似好多，但佢比起其他狗幾浸毛，佢唔係，佢得一浸但其實好短下。
(伯恩山壽命短？)上網search你會有少少擔心，好似寫只有6至8歲，但我唔相信，我覺得應該悉心照顧同埋令佢日日都開心，應該唔只咁短壽命嘅。
(需要注意事項。)最主要有空間畀佢活動，其他都唔係太難打理；拖大狗出街一定要全神貫注喺佢度，有啲咩未發生之前你要預防，比如離遠有隻狗嚟到，你要拖實佢勒實佢喇，或者控制住佢唔好亂嚟，唔好拖住佢又走去四圍望。」
採訪：Ethan
攝錄：黃志明 -----------------------------
【2019 區議會專題】
最齊全區議會入閘名單 互動民調
11.24 用選票重奪區議會
-----------------------------
【升級壹會員登記站 為你解疑難！】
沙田、旺角、荃灣、觀塘、銅鑼灣5區為你服務
詳情地址
來源 source: http://nextplus.nextmedia.com
|
鍾意就快D Share啦！
|
|
|
