麥長青（麥包）和金剛成為新拍檔做主持，當住家男碰上浪子帶領一班師奶熱熱鬧鬧，間中講吓有味笑話，男人的浪漫由此起。金剛加入戰團和麥包爭做師奶殺手，勝負未定先來個廚藝比拼，在訪問前落手炮製了一味涼拌青瓜，風格高下立見。
兩人同樣嚮往自由度，近年跳出大台搵食，可以放膽地發揮所長工作，金剛盡情爆肚做回自己，收入機會更勝從前，已儲定老婆本結婚準備當爸爸。
在大台工作多年，麥包與金剛沒有機遇碰頭做節目，反而離巢後一拍即合，齊齊轉投ViuTV主持旅遊節目《C9旅行團》，講到今次合作原因，金剛毫不忌諱：「我諗促成合作係因為我哋合約完咗，哈哈。」麥包即笑謂：「咁黑人憎嘅講嘢！」金剛續說：「我講事實啫，啱啱好係一個緣份，同包叔叔第一次合作做主持，合作舒服，唔會令你覺得講呢句唔啱，講嗰句唔啱，想點呀？大家好配合，想講乜咪講。」麥包又自嘲：「佢係潮人，我係老土怪，一齊就燉返勻大家，又令我年輕啲。」言談中金剛依然操半鹹半淡廣東話，發音繼續成為笑料，麥包一邊讚金剛幽默一邊寸他：「佢明明可以學到講得正廣東話又唔學，睇佢平時識捉某啲音就知佢對廣東話好了解啦，識用呢啲粗鄙發音令大家開心你話佢幾叻。」金剛惟有認衰：「我有懶音，好多時知點講，但一開口時好繞口。」
麥包因拍劇及做飲食節目，早已打入師奶巿場，反而金剛加入挑機，到底誰人是師奶心中男神？麥包說：「不相伯仲啦，各有所長，我四平八穩。」金剛笑說：「鍾意聽衰嘢就我講啦，正經資訊嘢就包叔啦。」
住家男和浪子擦出男男火花，比起二人過往合作做飲食節目對象有異，麥包認為：「男仔講嘢可以放啲，女仔要避忌。我同金剛年齡層同喜好都有分別，佢潮我老土又有分別，加埋有唔同化學出現。」金剛尊敬前輩：「唔係老土，係有自己style。」節目中麥包和金剛和一班師奶團朝夕相對，每日都俾女圍，其中一幕大家浸溫泉，令金剛驚歎表示：「嘩！不得了，第一次兩男同廿幾個女人共浴，你話係咪不得了，一邊平均年齡50，另一邊20，所以真係好不得了，成件事老中青行埋一齊。」麥包則說：「大家傾偈交流好開心，又有台灣年輕KOL。」
兩人和新公司合作有新構思、新鮮感，麥包說：「舊公司我哋做咗咁多年，好有規範，各有各好，令我哋知道有底線，邊啲講得唔講得，有時我哋覺無傷大雅，但公司會可免則免；但呢邊乜都可以試咗先，唔得咪cut囉，可以玩多啲。」金剛絕對認同：「尺度大好多，我覺得綜藝好多嘢冇得綵排，『人生不用重來，表演不用綵排』，綜藝就係要自然，要大家睇得好笑，有啲嘢排唔到。溝通最緊要，如果我哋覺得麻麻地喎，呢邊可以調整，會即刻改，自由度好大。」金剛三言兩語說到重點，就喜歡現在多於以前，麥包則笑笑口：「我講啲四平八穩說話啦，多謝舊公司訓練，現時空間大好多更加好，今次拍攝我哋好開心。」金剛即哈哈大笑：「包叔叔你返唔到去㗎嘞，你講啦。」
離巢後工作和收入都不遜於以前，金剛專注做演員密食拍戲，他一臉滿足：「我差唔多買咗個腎。都OK。」麥包向來涉獵範疇多，也不愁機會：「舊公司係我大學，我中學未完入咗去，學到所有功夫都想出嚟試下自己，係咪可以上擂台同人比拼，我當自己係新人，喺公司30幾年，冇接觸外面，重新去感受吓。」兩人和一般外闖藝人一樣，走得快好世界，並沒有因大台改朝換代離開感可惜，尤其金剛本身是台灣過江龍，他坦言：「由台灣來時已係『闖』心態，對我嚟講而家係換個地方做嘢，唔會有重新開始嘅壓力。」
現階段金剛雖未算是賺大錢，但至少收入有改善，和台灣女友梁云菲（Nana）戀愛甜蜜蜜，工作愛情都如意，已經儲定老婆本，未婚已慈父上身想做爸爸，罕見金剛一臉認真：「我想結婚生小朋友，每次見到我外甥都大個咗，錯過咗好多，自己現時40歲，（第時）小朋友20歲我都60歲啦，點同佢去夜總會呀，冇力喎。」從一位浪子到近年被女友收服變成暖男，金剛深情地說：「我哋所有嘢好夾，包括觀念、着衫、鍾意啲嘢，佢鍾意打機，留喺屋企。拍拖同另一半成日唔出街，佢會話：『吓，喺屋好無聊呀。』要出去又話唔知去邊要我諗，但佢唔係咁，反而係我問佢：『喺屋企好多日喎，我驚變屍體喎，要唔要出去行吓？』 我哋好多嘢好啱，對結婚生小朋友都係，機乎冇乜點嗌咬。」聽到金剛說話感受到他的甜蜜，以前花心形象不再。
採訪：卓寶花
攝影：沈健程
DV片段：馮嘉銘
|
鍾意就快D Share啦！
|
|
|