2019年12月17日星期二

【頭條獨家】不容小三演《多功能》學識依賴老公千嬅講明丁生若出軌誓棄夫出走 __,小三,楊千嬅,

【頭條獨家】不容小三演《多功能》學識依賴老公千嬅講明丁生若出軌誓棄夫出走

性格剛烈的千嬅，坦承絕對容不下「小三」，完全跟「藍飛」是兩種性格的人。

楊千嬅相隔18年最近再拍港劇，在《多功能老婆》演繹積極面對失婚的「藍飛」，她坦承今次肯拍只因鍾意監製陳寶華編寫劇本夠晒貼地。《多功能》中，令觀眾睇到咬牙切齒一幕肯定係「藍飛」被「小三」硬搶老公黃浩然，千嬅坦承角色同自己反差好大，自己一定冇「藍飛」咁包容，若然丁生出軌，衝動的她必然會算數放棄呢段婚姻，「我會一筆炒起晒然後走，重新嚟過，最多我同個仔解釋。」她又話演完「藍飛」令學識點樣做人老婆，太獨立對老公未必是好事，「原來適當地依賴，反而令老公覺得係開心嘅事。」撰文：杜淑霞攝影：梁志明形象：Anson Lau 髮型：Vic Kwan關列峰@ii Alchemy Hair&Nail 化妝：LingChan @Ling Chan Make Up 服裝：@tibi@harveynicholshk

千嬅鍾意今次《多功能》故事夠寫實，睇完劇本就決定要挑戰，「點解今次我咁有興趣，係我覺得寶華姐今次個劇本係好時下好貼近嘅嘢，尤其是婚姻失敗之後企番起身，有啲人選擇好負面咁生活，或者好唔開心，但係寶華姐呢個故仔係比較正面好積極，呢個積極唔係好說教嗰種，失婚大不了咪從頭嚟過，不特止仲唔會話等番個老公返嚟，可以去move on一段新感情，電視尺度好少拍呢啲，仲要嗰個係姐弟戀嚟㗎喎。」

同「藍飛」反差大

今次角色「藍飛」令千嬅好想挑戰，正因跟她個性反差比較大，特別是處理感情問題，「我嘅包容力量冇『藍飛』咁強，我好明白要堅守一個家庭，係要唔同經歷，係需要包容，去成就一件事每個人都會犯過失，會畀大家反省空間，但嗰個信仰都冇『藍飛』咁深入。我可能係一個職業女性，事業型嘅人，某啲價值，尤其我係藝人，思維邏輯真係好自我，我未必有呢份耐性，因為感性嘅人就好衝動，我係更加感性嘅人，『藍飛』其實係好理性嘅人，所以感性同理性嘅差別就係，我會算啦一筆炒起晒然之後我走，重新嚟過，最多我同個仔解釋，我對待件事冇咁理性囉！」

千嬅最難忘戲份就是這場「藍飛」內疚因自己爆響口，搞到老公「劍雄」被告，於是代老公向老闆「Morgan」求情。

為尊嚴寧行乞

演完「藍飛」後，千嬅自爆似上了一課，學識夫妻相處之道，「我發覺拍完套劇自己個人都有成長嘅，成長唔係喺演出技巧上，係做人邏輯思維上面，其實呢個世界有唔同嘅人，亦都真係有女人可以為咗個家庭犧牲好多嘢，我拍完之後都有思考，兩夫妻嘅嘢，我自己有時太過感性太過衝動，我演完『藍飛』之後，同丁生相處上，覺得有時我都要喺佢立場上，畀佢feel多啲我嘅感受，可能我同『藍飛』啱啱相反，因為我比較獨立，冇咁畀老公覺得被需要，冇咁依賴，原來適當地依賴，反而令老公覺得係開心嘅事，有時又唔可以多，多就麻煩㗎啦。」

雖然外界覺得「藍飛」跑住追車追返老公一幕感人，但講到最難忘一幕千嬅反而覺得要幫老公黃浩然向老闆張國強求情一場，「呢個係尊嚴問題，但成就老公尊嚴比自己尊嚴更重要，作為一個女人我覺得好偉大，自己睇劇本時個心都好唔舒服，但真係好難演，但演完自己都好開心滿足，因為現實中我係寧願行乞（因為你性格都倔強）係呀！但係拍完又學到嘢，性格倔強硬頸係態度，但有時為咗成就一件事妥協，都係一條出路。」