2019年12月17日星期二

【頭條獨家】貼中三甲名次《造星II》JJ唔Care分數享受最緊要 __,JJ,賈曉晨,造星II,

【頭條獨家】貼中三甲名次《造星II》JJ唔Care分數享受最緊要

JJ父母都有去睇比賽，問到父母對佢表演有咩評價？佢話:「未聯絡呀，電話無電呀。」

個樣有浸台灣唱作歌手味，26歲嘅JJ(范卓言)由比賽開始到結束都表現平穩，從無跌過去復活區，一直係導師心水人選，入十強是必須的。採訪:廖思慧、杜淑霞

對於失落三甲，JJ無唔開心，亦覺Phoebus實至名歸，佢喺台上伴住Phoebus講感想，的確好好笑容，睇得出真心。

JJ在總決賽排名排第6，兩Part表演分別有跟「邊疆兄弟」Rap自己作品《邊Gang》，另外就係唱《無盡》，「人生夢一場革命至蒼老」，佢話將首歌送畀追過夢同發過夢嘅每一位，明就明，多謝晒。問到揀歌有無特別意義?佢話《邊Gang》係自己作品，歌詞係自己心聲。問到心聲屬自己感情方面定社會大氣氛方面？他說:「社會大氣氛重要啲。」

至於揀《無盡》係因為歌詞好有意思。「講追夢，完全講中我，唔知觀眾睇得滿唔滿意呢?大家享受就心滿意足。」同JJ做訪問發覺佢交個波畀觀眾嘅感覺好適合做綜藝，ViuTV諗諗佢。JJ全程訪問笑笑口，因為佢好享受比賽嘅舞台，亦好滿意演出。提到三甲，JJ得戚連講四次貼中晒，連名次都貼中，「Dance Battle完全為Phoebus度身訂造， MC唱歌有實力，而Oscar亦不得了，紅館式震憾演出。」JJ更大讚Hugo第一Part表演好正，完全符合佢Style。提到分數，JJ秒速表示完全唔介意分數，入十強後剩係想享受表演，觀眾Enjoy就夠嘞。