兄弟爬山，不割席。
但見到個別手足有問題，更以「搞分化」作擋箭牌，想堵住說真話的嘴，又是否要啞忍？
阮民安（Tommy）的舊同居女友阿K拒絕屈服，見到Tommy高調搞眾籌，更誣衊追債的她是藍絲扮黃。她說：「我本身係和理非，近日見佢好似英雄咁行出嚟，我認識嘅佢係一個好有目的嘅人，我唔想畀機會佢去害人。我因為佢孭咗四、五十萬債，佢一蚊都冇還過畀我。」
本刊向他求證欠債一事，他表示：「點解個女仔唔直接搵我？」
其實阿K已向他發送追債信息，更表示不介意公開對質。
但被問到願不願當面對質，Tommy表現抗拒，激動地說：「我點會同佢對質，佢要對乜嘢質，上律師樓傾，你可以搵律師同我律師聯絡。（不想公開對質？）我哋唔會講。」 12年在聖誕派對中認識Tommy，從此改寫了她的人生，阿K悔不當初。對於他在Facebook以「人誰無過」來推諉，阿K說：「人誰無過，對啊，每個人都可能曾經做錯事，如果你今日行出嚟承認自己嘅過錯，同埋你願意去負責任，還番晒所有錢畀我，我都會公開話畀所有人知，你係彌補緊自己嘅錯，而唔係喺度講一套做一套。」 阿K花了約五年時間，才還清接近五十萬債項。她坦言因Tommy欠下一身債時，曾想自殺。
「當時我唔夠膽同屋企人、朋友講，被人上公司追數，最後搞到要辭職。我同佢（Tommy）講，如果再無錢還，我真係要去跳樓。有一日我望住啲錢，份工又無埋，就諗住喺個單位跳落去。」
拍拖三個月，Tommy便提議在土瓜灣翔龍灣開始同居。
他指阿K有穩定收入，由她出面租屋較好。後來她才在地產經紀口中發現，Tommy是該區有名的租霸，但熱戀中的她不以為然。
她一直負責屋租及大小雜費，但同居日久，她漸漸發覺身邊財物不翼而飛，同時Tommy會用不同藉口問她攞錢應急。 事實上，早在拍拖一星期他已「現形」。
「嗰次我哋去尖東食嘢，期間佢收到一個電話。再隔一陣， 有兩個男人喺我哋身邊行過，用眼神示意叫佢出去，Tommy講咗一句：『佢只係小妹妹，唔好嚇親佢！』然後佢叫我走，半個鐘頭後Tommy再傳短訊畀我，問我有冇錢喺身？佢話要七千蚊。我問係咪畀七千蚊就會放你走同埋安全？佢話係，我就喺附近櫃員機轉賬畀佢。」
Tommy叮囑她別報警，相隔個幾鐘，他怒氣沖沖地回家。
「佢問我知唔知道邊個係林雪？佢話今次俾佢累死，我好心幫佢做擔保人，而家佢唔還錢，所以啲人嚟追我，之後佢話呢七千蚊就當係幫咗林雪。」
本刊向林雪求證，有沒有搵過Tommy做擔保人？他透過經理人表示：「唔係事實嘅嘢唔回應。」 後來Tommy在一間培訓小朋友的娛樂公司找到工作，「佢話以依家嘅身份，好需要一架車。當時佢話要買一架黃色Mini Cooper，車價十八萬。佢話老闆幫佢搞，但只係爭一個名。佢每個月要畀六千蚊供車，我估佢供咗兩個月之後就已經無錢供。當時我月薪三萬蚊，扣除每個月屋租、供車，同埋借錢畀佢，其實自己都已經無晒錢。」
雖然阿K負責供車，但Tommy卻是駕駛者，他胡亂泊車，讓阿K被告上法庭。
「寄信嚟嘅時候，已經累積咗二、三十張告票，有執法人員上門話要凍結我嘅資產，最終要鬧上法庭。」 懶理供車搞到一鑊泡，他再要求阿K代向財務公司借十五萬。
「我喺車上已經喊緊，話孭緊架車，同埋已經無錢，你想帶我去邊？佢話我哋依家有出路喇，老闆幫我諗咗一個辦法，話睇過我嘅入息證明好好，可以借一筆錢返嚟還清所有欠債，之後大家都唔需要辛苦。然後我就話依家嘅辛苦，係你建立畀我㗎！佢話得啦，你細路女唔識得諗，然後佢打電話畀老闆，內容大概係：『係囉，個傻妹驚喎，你咁大間公司，出糧時幫我畀過去咪得囉！』但到最後，我亦從來冇收過錢，又要孭多一條數。」
代Tommy供車上會，以及代他向財務公司借錢，阿K均要求他寫下欠單。他承諾自己負責債項，定時還款，可惜從沒實踐承諾。
比對最近Tommy入紙申請伊館的簽名，筆跡跟承諾書一樣。 後來他叫阿K申請三張信用咭，用來冚數。
「佢話打個電話就有七萬蚊，叫我快啲打去啦，佢話你唔打，我幫你打。佢坐喺度睇住我打電話。」
阿K多次提出分手，要求他搬走。
「我有提出過，其實佢唔會走。第一我同情佢，因為佢話全世界同屋企人都唔理佢，佢咩嘢都無。第二就係我覺得如果同佢分咗手，無晒任何關係，我就會孭晒所有欠債。」
阿K獨力承擔一切，向家人隱瞞。
「最初我都唔想人哋覺得佢係衰人，同埋唔知道點樣去講畀其他人聽，原來呢個世界係有呢啲人。我連屋企人都唔夠膽講，但我為咗佢，走去問屋企人借過幾萬蚊。他每次問我攞錢，都係話你再唔畀我，我就會死。」 拖拉一年，有一天Tommy帶現在的太太Eva，回阿K的住所密會，阿K終於甩難。
「我放工返屋企，聽到屋入面有笑聲，開門就見到一個彩虹頭髮嘅女仔坐咗喺度，就係佢而家嘅太太Eva。佢一直摸住自己啲頭髮對住我笑，將我廳入面嘅相架收起晒，攞晒我啲蠟燭出嚟點，佢哋可能喺客廳飲咗少少酒，我問佢哋做緊乜？係咪阻住咗佢哋？Tommy就話開緊會。我問點解要喺我屋企開會？同埋點解要收起晒我啲嘢？」
Eva起身離開，「嗰一刻我追出去同嗰個女仔講唔好走，執番件垃圾Tommy走。」
之後Tommy哭著跪在地上，不停向阿K道歉。
「佢仲撼頭埋牆，撼咗好多下，佢話覺得自己好賤格，點解要咁樣對我，佢都知道自己衰，叫我唔好趕佢走，佢無地方住，唔想再住桑拿房、劏房，唔想瞓街。佢話呢個女仔只不過係佢嘅櫃員機，幫佢搵錢，佢係諗緊辦法同我過好日子。佢話我會還番錢畀你，叫我畀佢繼續留喺度，先至可以還錢畀我，我說算啦，你走」
對於Tommy走上街頭，阿K說：「我唔否認佢係黃絲，但係我諗緊佢嘅行為，其實目的係咩呢？如果依家利用我哋香港人嘅同情心，我會好擔心仲有下一個受害者，我唔想其他人嘅錢會唔知被攞咗去邊。」
欠債還錢，天公地道；不割席，但錢銀要分明。 -----------------------------
【壹週刊直播平台 ChannelNEXT】
全城抗暴 區區論壇同你深度剖析
立即睇
-----------------------------
【升級壹會員登記站 為你解疑難！】
親臨旺角做升級壹會員，即送「香港人：抗爭之夏」限量明信片
詳情地址
來源 source: http://nextplus.nextmedia.com
|
鍾意就快D Share啦！
|
|
|
