機上遺留老公呼吸機同藥 肥媽焦急爆喊：係要嚟救命！
肥媽（Maria Cordero）昨日於Facebook（fb）自爆經歷驚心動魄的一程機，話說她與葡籍老公Rick從英國飛往馬來西亞途中，竟遇上飛機故障，幸最終安全落地。折返倫敦後，夫婦倆入住機場附近酒店，瞓醒一覺再起程，今日二人終於到達馬來西亞，不過肥媽下午又於fb出Po，指此趟旅程簡直「驚」喜一浪接一浪！原來她剛才匆匆忙忙落機，居然大頭蝦地將老公的呼吸機和藥一律遺留在機上，肥媽寫道：「因為老公的病（兩年前患上肺癌）關係，肺同呼吸其實唔係咁好，所以呼吸機同藥有起事上嚟係要嚟救命，所以𠵱家活多一日其實都賺咗。」
片中，大感憂心的她哽咽道：「在家千日好，出門半朝難。嘩，好辛苦，𠵱家到咗馬來西亞吉隆坡等轉機去亞庇……佢哋（吉隆坡機埸和機組人員）好好，啱啱先話幫佢搵到（呼吸機和藥），攞緊過嚟畀我，所以忍唔住……」語畢肥媽即脫下眼鏡爆喊，她續說：「好多謝大家關心，頭先一落機收到好多信息，多謝大家關心，冇事喇，唔該。」最後，她再次留言感激今次旅程上遇到的好人好事。
其後，心情好番啲的肥媽又於微博上載短片，分享日前在倫敦做「全職主婦」，在家中煮飯、湊孫、做家務等的生活點滴，她笑謂：「總之每一日一張開眼，就開始做做做到夜晚，飯要煮好多好多，因為人好多，個個又食得，呢兩個孫細，無限精力，周圍跑，周圍跳，啲玩具執完又亂過，再執再亂，我好掛住香港的姐姐呀！」不過，肥媽直言仲有精力湊孫都是一種福氣。
來源 source: http://hd.stheadline.com
|
鍾意就快D Share啦！
|
|
|
