踏入60歲的洪朝豐，接受《蘋果》獨家專訪，首次公開他同志身份，也披露當年他跟前度女友寶詠琴戀愛故事，以及二人第二次分手原因。
1998年11月某個夜晚，時為新城DJ的洪朝豐，為節目第二次訪問寶詠琴做資料搜集，到寶詠琴山頂寓所傾談，一講講足7粒鐘。洪朝豐說：「完咗之後佢車我去灣仔搭過海的士返屋企，臨落車時好自然我錫咗佢一啖，佢冇拒絕我，佢覺得好愉快。事後佢話第一次同第二次見面之間嗰個星期，香港其實有流星雨，佢話好掛住我，好想同我睇流星雨......嗰時我哋香港京劇研習社有個演出喺西灣河，我邀請佢去睇，喺嗰度我哋第一次拖手，去到12月初時，我同另外3個音樂人喺大會堂劇院有個聯合音樂會，我作為一個男高音，我請咗佢嚟睇。」
當晚表演結束後，洪朝豐致電寶詠琴問可否到她家過夜，寶詠琴答應。「嗰晚係我第一晚喺佢屋企過夜，第一次發生性關係。」
洪朝豐跟寶詠琴愛得高調，互相也恨得透徹，二人由反目成仇到復合到再次分手，曾是全城熱話，比起任何一部高收視連劇還更精采。
洪朝豐直認二人性格上其實有很大差異：「我哋一出門（旅行）就容易唔開心，因為路上大家要相依為命，過程裏邊好容易有拗撬。我舉一個例，譬如我哋喺巴黎戴高樂機場，落機時等行李，我想去洗手間小便，我搵咗好耐，啱啱見到寶詠琴好『呢hea』喺輸送帶搬行李搬落嚟，我即刻走去幫忙，咁佢就鬧我：『你做乜去洗手間去咁耐呀？』我話我搵唔到洗手間，去咗好遠，佢話：『嗰度咪有囉！』指住個好近嘅地方，我話睇唔到，佢嗰時有個司機嚟接佢，我哋同個司機隔住玻璃之類，我當時態度亦都唔好，因為我覺得我只不過係遲咗嚟攞行李，你唔需要發咁大脾氣，所以我鬧返佢。事後佢話我唔好，唔應該喺佢司機面前鬧佢，我冇理佢。」
「又或者我哋去京都玩，喺大阪機場轉火車，我又要去搵廁所，返到嚟佢又發我脾氣，因為火車就嚟要開，佢係嗰種樣樣嘢要好準時，樣樣嘢喺自己控制範圍裏邊，習慣咗每樣嘢都好規矩，每樣嘢都係佢掌握裏邊，如果唔係佢掌握之中，佢就會有脾氣。」
「仲有一次，1999年9月我哋去歐洲玩，我第一次坐郵輪，我哋喺一個港口落，然後去佛羅倫斯睇大衛像，大家坐巴士，一路去到博物館，一落車佢口黑面黑，我都唔知佢乜嘢事幹，唔知佢嬲乜嘢。睇完大衛像返去船度，佢好冷言咁同我講：『我頭先見到窗外景色好靚，但你瞓覺瞓到好似死豬咁，我覺得好唔開心，所以返到香港我會同你分手，我會開個記者會，講畀記者聽，你gay，我當時感覺係：『乜嘢事幹？我只不過瞓咗一餐覺咋喎……』呢次係第一次分手前夕，到第二日，佢好似乜都冇發生過咁。或者我能夠理解佢一樣嘢，佢一生人為他人作嫁衣裳，為人好，對自己唔好，佢會覺得照顧我花咗好多心力，所以當佢覺得佢得唔到應該有嘅回報時，佢會好失望，好唔開心，包括佢帶我去世界唔同地方玩，然後旅途上我嘅表現，令佢覺得唔滿意，令佢覺得冇受照顧、冇受到應有嘅關心，因此佢對我失望，我可以理解囉。佢好愛我，好照顧我，但同一時間亦都好攰，所以我稍為有啲乜嘢佢就唔滿意。」
跟寶詠琴第二次分手，洪朝豐說導火線是寶詠琴不滿他顧住瞓覺。「喺紐約我哋住四季酒店，佢秘書幫我哋book咗間食龍蝦好出名嘅西餐廳，因為佢知道我好鍾意食龍蝦，想氹我開心。晏晝未夠時間，我哋喺酒店，我好眼瞓好攰，我就瞓覺，佢坐喺我隔籬睇報紙，我瞓醒就行啦，但佢嗰日好奇怪囉，佢一路唔出聲，應該歡天喜地去食龍蝦。去到餐湯上嚟，然後佢先講佢嬲，嬲嘅原因係晏晝佢好想同我傾偈，好想我陪住佢，但我走咗去瞓覺，唔理佢，我聽到好失望，個餐湯我一路攪冇飲到，佢開始好驚，我冇出聲，然後返到去佢話我病發作，我抑鬱狂躁症發作，話要打電話畀我醫生，叫我醫生加藥，跟住第日我就同佢分手。」
有人覺得洪朝豐跟寶詠琴一起是為錢。
洪朝豐否認：「我對佢嘅錢冇興趣，一啲興趣都冇，一路以嚟我頗為視錢財如糞土，而且1996年我過檔新城，我當時簽兩年約，頭一年係100萬年薪，第二年係150萬年薪。到我遇到寶詠琴，我係170萬年薪，到我同寶詠琴分手，我係賺緊200萬年薪，我係完全唔需要靠寶詠琴嘅錢都生活到。不嬲我都係重視精神世界，多過物資世界嘅一個人，所以啲人覺得我走埋去佢身邊，事實上佢都走埋我身邊，大家互相吸引。我哋大家走埋一齊，點解要同錢扯上關係？點解大家睇嘢係咁世俗？點解佢哋唔相信呢個世界上有真正愛情？如果佢哋抱住咁嘅態度去睇我同寶詠琴拍拖嘅話，我會覺得呢班人好可悲囉，因為呢樣證明喺佢哋生命入邊未出現過真正愛情。」
採訪：戴彩煥
攝影：郭賢興、周樂恒
攝錄：馮嘉銘、林賓尼
-----------------------------
第三屆最港電影大獎
按此立即投票
-----------------------------
《果GYM》隨身播 健身壹App過！
一按即玩
來源 source: http://hk.entertainment.appledaily.com
|
鍾意就快D Share啦！
|
|
|
