警隊昨日與晨曦明星足球隊踢波,之後舉行晚宴聚首一堂,有警務處處長鄧炳強、香港警務處人事部遴選委員會總警司謝振中、曾用槍指嚇市民的「光頭警長」劉澤基、2014年佔中用警棍襲擊途人的退休警司朱經緯等人現身,同場有成龍、曾志偉、譚詠麟、方中信、林國斌、梁競徽、歐陽震華、盧惠光和衛志豪等,身穿螢光黃色長袖衫的梁競徽,更和謝振中熱情擁抱。
警務處處長鄧炳強在台上表示:「首先好多謝晨曦及明星足球隊,今日同我哋踢波,仲同我哋食飯,多謝晒!我好多謝我警隊嘅兄弟,因為佢哋真係好撐我。」全場歡呼,阿倫拎住個咪講:「香港靠你哋!」,鄧炳強續說:「冇佢哋撐住……我今日好興奮,因為見到好多偶像,有成龍、Alan、志偉到Ben,全部都係我偶像,我個心跳得好緊要,其實點解我喺區議會講嘢咁叻,就係聽志偉嘅《開心字典》。」志偉露出招牌笑容,雙手合十,阿倫笑言:「嘩!咁樣好危險。」
鄧炳強又稱就是志偉的《開心字典》才學到:「我做警察係因為成龍大哥、方中信,全部都係學你哋,我唔知點做警察,睇吓睇吓就識做,另外,我真係好憎你(譚詠麟),因為我老婆鍾意你,仲多過鍾意我。」阿倫忍不住叫:「呢個咁大罪名。」鄧炳強主動捉着阿倫的手說:「冇辦法喇!因為我都鍾意你,今日真係好多謝咁多位鍾意踢波嘅朋友,同埋演藝界嘅朋友,其實大家係老友,全部在心中,唔使講嘢,只要你哋畀個手指公我哋,我哋赴湯蹈火,在所不辭。」全場又一齊舉起手指公。
另一段影片見成龍亦上台叫:「喂!過嚟我哋唱《朋友》呀!」成龍忽然轉普通話講:「不管我們是哪一個階級,我們永遠都係朋友。」鄧炳強及晨曦班主周文曦在旁邊拍手,志偉試咪時,阿倫即搶咪:「你唔好搶呢個喇!你都唔識唱歌。」志偉叉腰扮嬲,鄧炳強搭着他的膊頭安慰,志偉笑一笑擁着鄧炳強的腰,之後阿倫講:「咩時候係見真情呢?患難就見真情,音樂可唔可以大啲。」成龍就插嘴:「我喺南斯拉夫個腦開刀嘅時候,我呢位朋友吹緊口哨……」接着成龍與志偉、阿倫,加埋鄧炳強一齊唱《朋友》;謝振中則與阿倫對唱《再見亦是淚》。
成龍所講就是1986年跟阿倫及志偉於南斯拉夫拍《龍兄虎弟》時發生意外,頭部落地,在當地做手術後,他曾講過昏迷時有人吹口哨,睜開眼見阿倫坐在病床邊吹着《朋友》。
-----------------------------
第三屆最港電影大獎
按此立即投票
-----------------------------
《果GYM》隨身播 健身壹App過!
一按即玩
來源 source: http://hk.entertainment.appledaily.com
鍾意就快D Share啦!
|
|