- 【林國斌曾阻豬隊友拍片】撐警宴阿倫同警嫂合唱 鄧炳強:好憎你 我老婆鍾意你多過我
- 13分鐘前
正當全球被內地「武漢肺炎」所累，唔封關嘅香港更因疫情肆虐受到極大威脅，無論政府，抑或港大微生物學系講座教授袁國勇都呼籲市民減少聚會，人多地方要戴口罩，保持個人衛生，減低疫情爆發的機會之際，警務處處長鄧炳強率同僚，跟晨曦明星足球隊成員，熱熱鬧鬧離罩集會，又唱又飲口沫橫飛。
本來係閉門集會，唔係！係聚會先啱，原本藍色藝人撐警合家歡，公眾點會知呢！依家浮晒面變熱話，真係多得當中「朱隊友」，2014年佔中用警棍襲擊途人嘅退休警司朱經緯，拍片開心share所致。
但原來場內「斷水流大師兄」林國斌，發現有人拍片，即一副兇相，上前欲手擋鏡頭制止:「唔好錄呀！」，可惜大師兄未能及時阻止，就連呢條「止拍制亂」片都一樣俾人開心些牙。
講番撐警離罩宴，鄧處長不停發表偉論，開籠雀點止佢，連警嫂佢老婆亦大開金口，同偶像「藍校長」阿倫合唱《明天你是否依然愛我》，警嫂嘅歌喉，藍校長有冇打尿震就唔知，但拿拿聲舉起手指公，讚到出面就人人聽到:「起碼一樣嘢啱key」，而謝Sir謝振中亦好識做，用手機幫第一警嫂拍片紀念，演活「忠誠勇毅」。
老婆同「藍校長」合唱完，又係警務處處長鄧炳強發言時間:「真係好憎你(譚詠麟)，因為我老婆鍾意你，多過鍾意我。」得第一警嫂「愛慕」，阿倫話:「呢個咁大罪名。」鄧炳強捉住阿倫手:「冇辨法喇！因為我都鍾意你。」，曾經喺網民形容為「四點警慌會」做台柱嘅謝Sir，當晚亦攞起支咪同阿倫合唱，估唔到謝Sir唱到兩咀喎！
撐警宴中屬明星足球隊成員嘅羅鈞滿都喺現場。咦……之前佢喺fb post準備上機相片，點知俾網友發現佢口戴CSI，即懲教署生產嘅口罩，即惹網民留言質問:「你轉咗做公務員咩！」，今日佢現身撐警宴，有啲嘢你懂的。
有眼利網民仲發現，場內烏煙瘴氣之嫌，事關撐警宴中有人喺食肆疑似食煙！於是有網民就問:「乜食肆唔係禁煙咩？」，大膽，滿佈執法人員之場，有人竟然知法犯法？
----------------------------
【壹週刊 武漢肺炎專頁】
緊貼防疫資訊！口罩訂購情況、確診個案、病徵潛伏期、封關國家名單、保險點賠？
與你遠離瘟疫 睇清官謊！
立即睇
-----------------------------
【壹週刊直播平台 ChannelNEXT】
專家教你自保攻略｜口罩點揀｜防疫點做
立即睇
-----------------------------
疫情追蹤，最新消息，Follow 壹週刊Telegram：
點擊追蹤
|
鍾意就快D Share啦！
|
|
|
