疫情來勢洶洶，市民都乖乖留家煮飯仔，食店生意慘淡，街市卻人頭湧湧！百業蕭條，經濟前景未明，買餸煮飯都要慳得就慳！「100蚊廚神挑戰賽」繼續請來廚師以$100烹調數個菜式，並邀請街坊試食評價，讓你以貼地街坊價煮出廚師級數家常菜。
今集的挑戰者，是九十後靚女林青怡。這位擁有碩士學歷的女生，放棄高薪厚職的政府行政主任（EO）職位，一年多前走到荃灣經營拉麵小店「青木小麵」，雖然小店最近無奈結業，但青怡對烹飪依然充滿熱情。
挑戰賽的賽制是挑戰者從三個分別放有三餸、四餸及五餸的信封抽出其中一封，再按結果而煮出餸菜。青怡抽到「五餸」，雖然大喊有難度，但依然信心滿滿，決定以最愛吃的家常和食應戰。
從小在荃灣長大，青怡對以「平靚正」聞名的荃灣楊屋道街市熟悉不過，「這裏是荃灣區食材最齊全的街市，單是魚檔已有六十多檔，連一些特別品種如長腳蟹、斑馬瀨尿蝦等都有售。而且價錢比市價便宜兩至三成，十元已有一大籃沙律菜，每逢假日都人來人往，亦有人跨區來買菜。」
她先用$5買了5隻雞蛋，然後再買各類蔬菜及豆腐，已經耗盡了一半金錢，不過她似乎未驚過，再用$15買雞扒及$34買鱲魚，剛剛$100。
雖然年紀輕輕，買餸時亦要不時請教街市檔主，不過青怡對廚藝卻頗有心得，提供大量煮餸貼士。例如「日式鱲魚湯一定要用慢火滾，否則會出現許多雜質，影響味道」；「玉子燒除了要注重翻轉的手勢，亦要留意火候，如因太大火而煎燶，內部不夠濕潤便會影響口感。她同時提醒大家，雞扒卷可以先用保鮮紙裹着，再包上毛巾，放入微波爐叮三分鐘便可以。至於薯仔沙律，切忌搗得太碎，並加入黃芥辣提升蔬菜的鮮味。最後的日式炒雜菜，青瓜可以先以鹽醃，再揸走多餘的水分，並加入少許白胡椒粉。
以$100煮出5道精緻和食，厲害！一對小姊弟最愛甜味玉子燒，分別給予一百及八十分，至於一位太太更說了五個「好食」，大讚菜式有媽媽的感覺。吓！青怡還未當阿媽㗎！
食材價目表：
雞蛋 $5
紅蘿蔔 青瓜 白菇 鮮冬菇 $18
薯仔 $7
蘿蔔 $5
椰菜 $6
大葱 $3
洋葱 $3
豆腐 $4
雞扒 $15
鱲魚$34
合共：$100
食譜：
1.鱲魚湯
材料：
1塊豆腐
3粒鮮冬菇
適量白菇
1/3條蘿蔔
半茶匙鹽
50g味醂
30g醬油
80g日式料理酒
1條鱲魚
做法：
-蘿蔔刨皮切塊
-大葱切段
-鮮冬菇抹淨切片
-豆腐切件
-白菇切掉根部
-鍋內注入五碗水，放蘿蔔
-下適量鹽、味醂、醬油、料理酒
-放鱲魚、豆腐、大葱、鮮冬菇、白菇
-慢火滾20分鐘
2.炒雜菜
材料：
1/3條紅蘿蔔
3/4個椰菜
適量白菇
2粒鮮冬菇
鱲魚湯
適量鹽、白胡椒、醬油、芝麻、海苔
做法：
-紅蘿蔔去皮切片
-椰菜切碎略炒
-撒適量鹽及白胡椒粉
-下少許鮮冬菇及白菇
-下適量鱲魚湯
-炒10分鐘
-放芝麻或海苔
3.薯仔沙律
材料：
1個薯仔
1/3條紅蘿蔔
半條青瓜
1隻雞蛋
適量 鹽、黑胡椒、沙律醬
1茶匙 黃芥末醬
半個洋葱
做法：
-烚熟半條紅蘿蔔及薯仔
-洋葱切粒
-青瓜切片
-雞蛋烚熟切粒
-薯仔剝皮搗碎
-以適量麻醬及芥辣拌勻材料
4.雞扒卷
材料：
2塊雞扒
適量紅蘿蔔、大葱
2粒冬菇
適量麻油、鹽、生抽、味噌
做法：
-雞扒去皮
-片薄成一整塊
-以適量鹽、味噌、生抽、麻油略醃
-放少許鮮冬菇、紅蘿蔔、大葱
-捲起紮繩
-包保鮮紙及乾毛巾
-放微波爐高火叮3分鐘
-略煎至金黃
5.玉子燒
材料：
4隻雞蛋
適量味醂、醬油、糖
做法：
-雞蛋拂勻
-下適量味醂、醬油、糖
-倒入少許蛋漿，微煎捲起
-下蛋漿再捲起
-逐層叠加，叠加至8層成形
編採︰林蓁逸、葉中升
攝影︰梁偉德
-------------------
《果GYM》隨身播 健身壹App過！
一按即玩
-------------------
工作辛勞想食餐好？《飲食男女》每日為大家示範三餸一湯，為你的住家飯帶來一點不平凡！
來源 source: http://hk.entertainment.appledaily.com
|
鍾意就快D Share啦！
|
|
|
