【娛樂人物】
李施嬅自去年離開無綫後，工作不斷，近日更擔正拍加拿大劇集。她坦言在無綫最後5年到達一個樽頸位，沒有很多劇集拍攝，想進步卻又沒辦法。經過5年點滴的積累，李施嬅改變過往想法，跳出舒適圈主動四出尋找機會，同時努力增值自己，演技成功大躍進。
撰文：比華利
攝影：陳慧安
現年39歲的李施嬅去年離開無綫後，工作接踵而來。問到李施嬅今年想行事業運還是桃花運？她說：「想行事業運先啦，兩者比重八二喇，我離開TVB差唔多一年，好多新事物、新嘗試等住我，好需要人哋畀我極強心針，同好運加強信心。」其實李施嬅前年已衝出香港，拍攝加拿大劇集《Blood and Water》第2季，劇集近日開拍第3季，李施嬅更擔正做女主角。
近年李施嬅演技上大躍進，思想也越見成熟，她承認開竅跟閱歷有關：「多咗靈感，特別我喺TVB最後嗰5年，我自己去到一個樽頸位，自己好想進步，但又唔得，呢幾年又唔係拍到好多劇，公司唔係好多嘢拍。」李施嬅明白被動沒有用，主動四出找機會去試鏡和增值自己，過去5年點滴積累，也在書中得到不少啟發，同時也改變了自己過往的思考方法：「原來我以前諗嘢方法好錯，冇嘢做時千祈唔好坐喺度埋怨，應該積極啲，幫自己搵多啲其他機會。一直喺一個comfort zone就變成原地踏步，慢慢又會好多埋怨，其實身邊仲有好多道門可以去開，不妨試吓開第二啲門搵出路，去跳出框框。呢幾年睇好多書，繼續做好自己，抱住正能量感恩嘅心，努力增值自己就一定會成功。」
想組織家庭
李施嬅雖然事業心強，但她也期待像好姊妹胡杏兒一樣，擁有幸福家庭：「好想有一日有自己屋企同小朋友，我知當有小朋友時，一定會慢落嚟，唔係我唔想一路衝，身邊朋友結婚生仔後，事業自然slow down，始終母愛偉大，必然會掛住屋企同小朋友。今年我決定開盡turbo衝咗先，等過一、兩年就諗吓組織家庭。」李施嬅不敢以兩子之母的胡杏兒做目標：「佢生得好犀利，我冇佢咁勁，佢可能仲會要多啲，會不停繼續造人，我唔想要咁多個，要生嘅話，一個夠，我鍾意生女。」不過，李施嬅雖然恨生B，卻怕血腥，她直言：「咁我睇唔到嘛，有布遮住。我要自然生，我覺得做媽咪係好靚一件事，由陀小朋友就feel到佢心跳，佢會喺你身體長大。」
靚仔係Bonus
單身的李施嬅身邊不乏追求者，十隻手指可夠數？她笑言：「咁又唔好數，怕越數越少。大家認識了解最重要，去到𠵱家唔係初戀喇，以前鍾意人哋送花追求，𠵱家係想搵一個知心人，大家傾到偈，明白我、支持我。我哋呢行要搵一個明白你嘅人好難，仲有要頂得順我工作忙碌，對方要睇住我幕前談戀愛，真係要好高EQ同明白事理，圈外人同我哋拍拖會好大壓力，佢會俾人起底。」李施嬅開出基本擇偶條件：「靚仔會好啲囉，冇嘅都OK，人始終都會老，最緊要夾得到，佢一定要有上進心同孝順，呢啲最緊要，有靚仔又fit係bonus喇！」
服裝提供：ba&sh
場地提供：Hyatt Centric Victoria Harbour Hong Kong
來源 source: http://hk.entertainment.appledaily.com
|
鍾意就快D Share啦！
|
|
|
