2020年5月10日星期日

【頭條獨家】30歲轉新公司好大感觸吳業坤恨拍拖唱開心情歌 #吳業坤

【頭條獨家】30歲轉新公司好大感觸吳業坤恨拍拖唱開心情歌

30歲嘅吳業坤希望大家睇到佢嘅實力，唔想緋聞成為焦點。

上月18日係吳業坤30歲牛一，今年初轉咗新唱片公司Sunny Idea，坤哥表示30歲係人生checkpoint，感受好大，加上轉公司，思想又唔同咗，希望穩穩陣陣繼續做演藝事業，畀人感受到他成熟一面，「因為踏入新嘅歲數字頭，唔可以再話自己係小朋友，要努力呀。」採訪：方騫平髪型：Ken Yong@Hair Corner k11artmall 服裝：Heron Preston@D-mop 場地：TIRPSE

喺疫情下吳業坤唔打算大搞生日會：「記得25歲搞過生日會，原來都係好空虛嘅。」至於生日願望，他只希望簽新唱片公司後踏實工作，唱多啲好歌：「一直想唱吓用嚟表白、用於結婚嘅甜蜜情歌，既然我跟同公司嘅JW都咁開心咁Sweet，有機會就一齊做一啲咁嘅歌啦。」

唔揀圈中人拍拖

口快快自爆好Sweet的坤哥打圓場否認有拖拍：「即係自己好歡樂，唔使有太多慘情歌，但歡樂都有好多層面，JW咁Sweet，都想偷佢少少甜蜜。」坤哥好希望拍拖，並表示正努力中。問到是否有對象？坤哥笑言感興趣嘅人一定有，「話冇你都唔信」坤哥坦言心儀嘅女仔有好多，「但絕對唔係漁翁撒網，心入面有諗過呢個女仔都唔錯，不過確定先同對方表白，但唔會係圈中人，感覺上同圈中人拍拖，圈子重疊會變得好複雜，一個藝人緋聞經已夠多，如果兩個藝人加埋一齊，條緋聞線就愈嚟愈長，經歷過16年時嘅是是非非，做乜都錯，仲講到我有13個圈中女友，𠵱家變得好避忌，只想喺技藝上被認同有價值。」