娛樂圈是一個好消磨人鬥志的地方，黃得生（Dickson），一個連娛記都覺得陌生的名字，但原來加入了無綫11年6個月。黃得生上月在社交網貼出員工證，宣佈自己離開TVB。
他在2008年報考第23期藝員訓練班，當年只有21歲，笑言一心想發明星夢，想不到一擊即中。「未入TVB前打過幾份工，自己又鍾意演話劇，好想入呢行發展。當年抱住試一試心態，唔得就繼續打工，得就向夢想啟航。好記得第一次casting，由大閘排到去二號閘口，條人龍都幾誇張。一星期後有人叫我second in，三號風球，我問仲需唔需要去，佢哋叫我照嚟，隔多個禮拜就成功咗，真係好開心！」
畢業後，由臨時演員做起，翌年已有機會上位，在陳豪和楊怡主演的劇集《點解阿Sir係阿Sir》扮演壞學生，「Killer-4（K4）」首領「囂屎」羅鈞滿、「中女」樂瞳、「宅男」朱敏瀚，還有「反枱」黃得生，四個壞學生全校見到都怕怕，非常搶鏡。「到現在仍有人記得我叫『反枱』，呢套有啲surprise，因為入行唔夠兩年就有一個較重嘅戲份，K4係劇入面較重要嘅角色，我哋之後都成為咗朋友。」
K4到今日，只剩下朱敏瀚有得留低。但其實當年劇集出街後反應不俗，黃得生即獲無綫簽藝人合約，成為親生仔，滿以為一帆風順，怎料卻前路崎嶇。「之後有機會拍處境劇《結·分@謊情式》，做商天娥同張兆輝個仔，又喺台慶（2013年）抽中過一部名車，但都冇用，唔知點解慢慢drop落嚟，可能自己得罪人唔知，俾人投閒置散。」近幾年，黃得生做的角色都不起眼，家丁、小偷、村民、殭屍、路人等，直到在《不懂撒嬌的女人》做王浩信跟班阿Bill，黃得生滿懷興奮：「最初以為得三場戲，但原來做男一跟班，終於有戲做。但有時唔係話做後面唔開心，學麥包（麥長青）話齋有工開唔好怨，但當見到師弟不斷咁去，係會有啲sad同心灰意冷，但公司政策係咁，都冇得拗。」
今日的香港，「港版國安法」殺到埋身，即使你不介意薪酬，不介意角色輕重，在無綫立場「政治不正確」已經是死罪。黃得生去年不時為抗爭運動在社交網發聲，更曾上載以手遮右眼照片，聲援疑遭警方射爆眼的少女。結果，上月約滿後不獲大台續約！原因是否與被標籤做「黃色」藝人有關？黃得生表示沒有深究：「佢（TVB）冇講得好明白，商業角度我好理解，大家唔同嘅意向咪算數。我原本仲有一年生約，佢哋話『我哋都唔係好想同你傾落去』，好坦白攤牌，冇講咩原因，我覺得都好，唔想傾就放我出去。」他直言當初出post，只是單純以一個香港人發聲，沒有想過有好大迴響：「我向來唔係太受人重視嘅人，報道出街後，公司冇同我傾任何嘢，但工作量明顯減少咗。我反而擔心影響到其他人，例如監製，所以我收返埋算數。」
黃得生不擔心被指「彈弓手」，認為同路人會明白。在他的老友名單中，有黃亦有藍，王宗堯涉7.1進入立法會被改控暴動罪，而K4首領羅鈞滿早前與警務處處長鄧炳強在飯局上同台，又用CSI口罩，與警方關係密切。得生笑言相信吸引力法則：「同宗堯喺2017年踢波識，6月初我都有去法院，成班好朋友完咗就去食餐飯，等佢放鬆吓。佢本身個人好開朗，無乜所謂，睇得好開，但匿埋篤手指我唔知啦。至於鈞滿，自從嗰壇嘢之後，冇私底下傾過，我哋有其他足球group，但冇特別提呢件事。我哋係主張民主，民主就係要去接納不同聲音，我知你唔想人影響你，我亦唔想你影響我，大家討論無意思，見面就傾其他嘢，但唔會特別約出嚟食飯，呢啲係吸引力法則，你係嗰班人，自然吸引到嗰班人埋嚟，溝通唔到，自然會彈開。」數年前，黃得生開始做網台主持，希望為自己尋找新出路。
採訪：嵐山
攝影：葉君海
攝錄：馮嘉銘
場地提供：M2 Cafe
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|