牛津大學畢業的林作戀上會考零分的裕美，「林美戀」遭林作媽媽公開反對，林母昨接受《蘋果》專訪，坦言要求未來新抱完美高質，目前這刻拒絕裕美入門，就算抱孫都不接受，寧願斷絕母子關係。
面對林母的強硬態度，身經百戰的裕美表現淡定，不斷強調伯母想法正常，似想向林母示好，她在電話說：「我冇乜特別感受，開心或唔開心，都係平常心。我覺得伯母咁諗係好正常，大家通常喺報章雜誌認識我，其實冇真正認識過我本人，有時對方咁諗非常之正常，好似一般網民咁睇我，就因為憑着花邊新聞認定我，都係好正常啫。坦白講，話明娛樂新聞，又點會真係講晒你啲真實嘢，通常都係攞嚟吸睛，所以自己覺得冇乜所謂。」
裕美依然希望有機會讓林母了解她：「他朝有一日到真係有機會傾偈就會了解，我都係嗰句，如果當你同我了解咗我嘅人，傾咗偈都係唔鍾意我，我係接受，但未傾過偈又未了解，就憑住新聞判斷一個人，我覺得係唔中肯，唔單止對伯母，甚至好多網民我都係咁認為，我唔會為自己講咁多，亦唔會刻意討好人，順其自然，路遙知馬力，日久見人心。」
對於林母指生B就脫離母子關係，裕美坦言沒計劃生B，問到林作有否安慰她？裕美冧爆說：「其實我同阿作基本上，大家嘅價值觀同諗嘢都好相似，可以話一個team，我同阿作係明白大家，所以我唔擔心，佢唔需要特登安慰我，因為大家心照。阿作諗嘢真係好特別，佢認為係好時機，可以講番我應該要講嘅嘢，之前我咁多年慣性經理人守則，有任何緋聞、新聞都唔好講咁多，直接認錯就算，可以平息新聞，阿作鼓勵我唔可以再係以前老土做法，佢點醒我，佢話寧我負人都唔好人哋負我，雖然我唔係太buy，所以攞平衡，應該要講就發聲。自己就嚟32，脾氣冇以前咁好耐性，但自己講嘅係事實，我可以發誓。」至於好友麥貝夷爆被裕美曾被老外舊愛家暴，裕美說：「至於我之前嗰段關係唔多講，唔好放大人哋唔好嘅嘢，阿作話我蝕低，但我想再見亦是朋友，我都係向前看。」
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|