2020年6月23日星期二

為《地產仔》紥胸扮「地產界姜濤」廖子妤每晚拍醒沉睡的胸部 #姜濤 #廖子妤

為《地產仔》紥胸扮「地產界姜濤」廖子妤每晚拍醒沉睡的胸部

《地產仔》由一班年青演員孭飛拍攝。

廖子妤（Fish）、陳穎欣（Yanny）、吳肇軒、胡子彤及MIRROR成員邱士縉（Stanley）等今日出席ViuTV新劇《地產仔》的宣傳活動。廖子妤以西裝look現身，自稱是「地產界姜濤」的她在劇中風靡萬千少女，更為此束胸上陣。她笑說：「就算幾細都好，都有啲嘅，起初紮到唞唔到氣，習慣咗就有安全感，幫助到進入角色。」問到怕唔怕愈紥愈細？Fish笑言，「我有特別照顧『佢哋』，每晚會拍一百幾十吓，拍返醒『佢哋』，驚『佢哋』一去不返。」

談到《地產仔》與無線的《殺手》對撼？Fish希望電視業百花齊放，最緊要觀眾有選擇；Yanny則對《地產仔》有信心，認為題材貼地兼搞笑。吳肇軒直言兩個平台各有捧場客，自己對《地產仔》有信心，最希望吸引大家「回流」睇電視。Stanley認為題材不同，《地產仔》較貼地；《殺手》則較型；胡子彤則希望更多觀眾留意年輕演員，笑問他們的優勢是否較《殺手》年輕一倍？他笑言冇一倍，只是後生少少。吳肇軒表示《地產仔》拍到似《古惑仔》或災難片，打交一場更要吊威吔；Stanley則笑指此劇應是史上最多爆屎渠的劇集，軒仔即笑稱劇集適合飯後睇因為可以清腸胃；胡子彤亦指此劇絕對能挑戰電視尺度極限。