人稱「𡃁妹」的李綺雯，雖被網民封為「童顏極限」，但35歲的她，其實在娛圈是個有十九年年資的演員。
在電視台，「𡃁妹」人微言輕，但作為肯發聲的香港人，每一句都不微，不輕。由14年到去年在社會運動的表態、撐醫護罷工耍求封關等，她都表現出非一般大台藝員，忠於自己的勇氣。
訪問中，她強調:「唔係好想用一個離開TVB嘅藝人身份去做訪問，寧願以一個香港人嘅身份去做訪問，因為我珍惜香港人呢個寶貴身份。」
面對港版國安法殺到，人人要自我「飲茶」，問敢言的「𡃁妹」擔不擔心？「咁耐唔會冇人冇試過抱怨政府，如果只係陳述事實都唔得，所有人都需要擔心嘅話，大家係咪更加要企出嚟！盡咗自己能力爭取，至少唔好有遺憾。做人最緊要良心過意得去，我成日都話良心係跟你一世。」
- 唔係好想用一個離開TVB嘅藝人身份去做訪問，寧願以一個香港人嘅身份去做訪問，因為我珍惜香港人呢個寶貴身份。」
- 在電視台，「𡃁妹」人微言輕，但作為肯發聲的香港人，每一句都不微不輕。
- 她出身亞視的女優選舉，憑牙尖嘴利及膽色，在比賽中挑戰食蟲，就算身材平平，也能贏得冠軍。
「我哋竟然喺內地同人鬥接地氣」
土生土長，眼見香港變得荒謬，失去公義，「𡃁妹」跟很多港人一樣，無力感越來越重，在揾食的演藝圈，處處更是良知與利益的決擇。「有好多人同我講過，喺大陸真係賺到好多錢，識得玩佢哋嗰套遊戲，就可以賺到錢，叫我咩嘢都唔好理，賺夠錢就離開。我覺得做人唔應該咁樣。
睇番演藝圈，所有人都話香港電影無得做，點解？就係因為當日呢班人，係佢哋背棄香港觀眾，佢哋選擇北上發展，而本身點解可以咁吃香？係因為佢哋將香港技術、創新帶返內地。但佢哋而家已經被同化，無論劇本、創作或者製作上嘅思維，都已經被同化。
更大嘅問題係，我哋永遠都唔及內地電影編劇、監製、導演咁接地氣，但我哋竟然去同佢哋鬥接近內地文化，唔係咁樣嘛！
況姐大家都知道內地電影嘅劇本創作，其實有好多制肘，如果佢哋只顧內地市場，我哋嘅創作咪愈嚟愈縮窄，亦都無辦法將電影邁向國際。其他國家，例如韓國、泰國，佢哋已經諗緊向國際發展，只有香港淨係諗住返內地。」
- 見好多同行背棄本地創作，只顧內地市場，她說:「更大嘅問題係，我哋永遠都唔及內地電影編劇、監製、導演咁接地氣，但我哋竟然去同佢哋鬥接近內地文化，唔係咁樣嘛！」
「唔認同嗰套點解又要賺人仔」
她說身邊，有很多雙面人。「好多得到利益嘅香港人，會覺得總之賺到錢，佢哋話點就點其實佢哋講呢句說話嘅時候，都係好唔認同內地一套，否則唔會講呢句說話，會叫人唔好理。
你自己內心又唔認同，但又要賺對方嘅錢，我覺得你個人究竟有冇道德、良知？搞到自己好似雙面人咁樣，究竟辛唔辛苦？我覺得好多人都已經變咗，我認識嘅好多人都係咁樣。」
「大家返內地工作係無問題嘅，例如劇組，或者其他單位合作，大家都係專業，互相尊重，而家我同一啲內地工作人員，仍有聯絡。工作範疇上係無問題，有問題嘅係政策，無論電影抑或者廣播事業都係愈嚟愈收緊、收窄。」
上週，播了三十多年的港台節目《頭條新聞》打壓下忍著淚說Goodbye。就算下季「生還」，相信軀殼靈魂變成國情版。
「港台《頭條新聞》，好多民主國家都會有呢類型節目，無論諷刺執政者或者其他部門，都一樣會有，但點解而家嘅香港就唔可以咁樣做？」
- 「好多得到利益嘅香港人，會覺得總之賺到錢，佢哋話點就點其實佢哋講呢句說話嘅時候，都係好唔認同內地一套，否則唔會講呢句說話……搞到自己似雙面人，究竟辛唔辛苦。」
如果有得選擇
成長之地，漸被扭曲，選擇移民嗎？「始終我好愛香港呢個地方，所以無諗過移民。如果你問我之後會點樣，如果有得選擇，我一定會繼續做番自己，繼續發聲。我唔係偉大，我只不過盡自己本份，以身為香港人身份，去講番關於香港人嘅事。」
點解仲咁大膽！「我冇結婚生仔，冇家庭負擔，少一點顧慮，所以更加應該做多一點。」
不屑歌舞昇平粉飾太平
今年四月，她約滿TVB，「𡃁妹」撐黃，預咗分手，且分不足惜。「其實自己唔覺得係「被離開」，方向唔同的話，就好似情侶分手一樣，雙方其實都有選擇權。」
道不同，最難受是外邊市民飽受濫捕濫暴，但他要你歌舞昇平娛樂港人。
「其中好離地嘅事，例如外邊正在遊行示威嘅時候，可能仲要好強調，做一啲歌舞昇平嘅表象，我覺得係同社會好背道而馳嘅一件事，喺我眼中，所謂嘅戲劇，其實都應該要反映時弊、社會、市民嘅生活，唔可能同社會太過抽離。真心覺得，無論幾多錢，都買唔到我嘅思想。如果我要繼續留喺呢間公司，選擇沉默嘅話，我覺得好對唔住自己同香港，既然係咁，不如選擇離開。
當好多人都叫你唔好講政治嘅時候，但政治其實正正影響民生，民生即係我嘅生活，既然影響緊我嘅生活，點解唔可以出聲？」
- 「當好多人都叫你唔好講政治嘅時候，但政治其實正正影響民生，民生即係我嘅生活，既然影響緊我嘅生活，點解唔可以出聲！」
- 道不同，最難受是外邊市民飽受濫捕濫暴，但他要你歌舞昇平娛樂港人。 「其中好離地嘅事，例如外邊正在遊行示威嘅時候，可能仲要好強調，做一啲歌舞昇平嘅表象。」
電視城還是井底
將軍澳工業村「圍城」內，多少個，知道外面的世界。
「有時候返到公司，見到佢哋睇電視，好多時睇住新聞台，但其實有冇認真去研究新聞，知唔知究竟發生咩嘢事？
因為你來來去去都係睇同一個角度、同一個電視台嘅新聞，見到市民出嚟遊行、示威，但有啲人連市民點解走出嚟都唔知，我會覺得，你不如熄咗電視機啦，睇嚟做咩呀！
裡面嘅人，好似圍住喺城入面咁，唔知道外面世界發生緊乜嘢事，不過我亦明白可能工作時間太長，圍住又係同一班人，睇嘅又係同一個台，所以有啲人，係唔知點解外界指TVB新聞偏頗，佢哋真係只活在自己嘅戲劇世界。」
只求聽話不求有腦
生得一副得意妹童顏相，但「𡃁妹」性格一點都不cuty可愛，接觸過的人都知道，她剛烈有個性。
「做藝人除咗要有演藝方面嘅才能，仲好需要個人嘅獨特性。但係香港娛樂圈有一段好長嘅時間都俾大公司壟斷，大公司簽藝人只係會睇佢聽唔聽話，易唔易管理，最好千祈唔好有自己想法，所以你見香港大公司嘅藝人，開口埋口都只係會話聽公司話，對佢哋嚟講，可能只係一個打份工嘅員工，習慣咗咁嘅模式，就變咗所有嘢都係聽吩咐做。」講到咁，唔好以為「𡃁妹」在電視城冇朋友！物以類聚，與她談得來的圈中好友，同一立場。「邊個唔講，因為我唔係佢哋代言人，亦唔想影響佢哋。
呢三、四年，其實多咗好多新生代嘅藝人，洪流之中佢哋依然堅持為香港發聲，亦有好多專注於本土嘅新導演。我自己都好希望觀眾能夠畀多啲支持，咁我哋先至可以用香港嘅電影、電視同埋音樂，繼續守護香港嘅文化。
對於做戲，我依然有份渴求」
- 生得一副得意妹童顏相，但「𡃁妹」性格一點都不cuty可愛，接觸過的人都知道，她剛烈有個性。
不是單單勇字當頭
企得出嚟講，一切後果預咗。「好多人覺得我性格比較剛烈，或者勇字當頭，但我唔係一個衝動嘅人，唔係一個不顧後果嘅人，做所有事情都會諗後果，都會諗有機會發生嘅ABCD後果。」
採訪:S.L
攝錄:LL Production House
化妝:joeW
服裝:My Aleshia
----------------------------
全新「和你撐計劃」 專享獨家禮遇 實際行動支持
按此了解更多
----------------------------
壹呼百應 號召有心人 請香港人睇壹週刊
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|