「娘娘」杜小喬去年高調在社交平台確認譚永浩的男友身份，每次提起對方，總會不自覺嘴角上揚如沐春風。日前她到觀塘宣傳新歌《側臉》，甜蜜分享自己的感情生活，又即場製作「少甜」法式焦糖燉蛋，小喬說：「唔使咁甜啦，本身已經好甜。」
甜，是味道亦是狀態。人人晒合照、隔空傳情是放閃，小喬卻有獨特的放閃技巧，她的「閃」是無時無刻的，是生活化的，是融於生活的，熱戀中的人格外神采飛揚。小喬說：「我喺佢身上學識樂觀，佢係天跌落嚟當被冚嘅人，未發生嘅事唔會諗；我就成日諗定最壞係點，悲觀底但係樂觀處理嗰隻，尤其呢段時間，我都想好似佢咁樂觀。有啲人覺得兩個人最好100%脗合，我又覺得唔需要，反而咁樣仲好。」
小喬與男友譚永浩因音樂劇認識，兩人戲假情真：「其實佢嗰時遲咗兩個星期先開始排戲，但係佢好努力pick up，我因為唔習慣做現場，所以都要好努力pick up。大家目標一致交流多咗，發現大家諗嘢好似，同埋知道佢係善良嘅人，呢份善良吸引我。其實我哋都有諗過會唔會因為個劇產生錯嘅情愫，但係我哋發現唔關事，個劇上年完咗，我哋嘅交流係有增無少，佢係我同事、知己、同伴。」提到最感動的一次，小喬感謝男友對她全心全意的付出：「我身體唔係太舒服，有日好反胃，直頭係面青唇白咁。佢完全冇理任何人嘅目光，喺街（模仿男友攬住自己的動作）問我有冇事，佢始終係大台嘅人，有一定嘅形象要維持，但係嗰刻佢乜都冇理。」
女人，最佳的「武器」是溫柔及好廚藝，小喬回報男友的方式，相信令不少男士恨得牙癢癢：「我成日整嘢畀佢食，就算收工好夜，只要佢想，煮到凌晨2、3點，我都會煮，佢一定會食晒，仲會好多謝呢個人煮嘢畀佢食。」平日訓練有數，難怪當日小喬跟小凌老師學整法式焦糖燉蛋時，有板有眼。
至於新歌《側臉》，原來亦與男友有關，她再次大讚對方：「佢真係唱歌嘅人，會教我點分段、大細聲、點樣投入。」小喬曾笑指錄音時，因想起男友令原意苦中帶甜的新歌變得偏「甜」，而自言是年度歌手的她，希望以唱歌說故事：「好多謝熊仔頭（YouTuber）畀咗個好靚嘅框架，令大家認識我，而做歌手係我第一次唔靠電視框去接觸大家。我覺得歌同歌詞，係幾好嘅方法去講自己嘅故事，不過暫時未學寫歌同填詞，都係專心學好唱歌同講嘢先。」
化妝：Onetung Ma
髮型：Dennis Tsui Of salon de lotus
場地：Cookology
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|