2020年7月24日星期五

符曉薇家中做運動囡囡搗蛋　陳柏宇被寸Hea跑揈唔甩肚腩 #符曉薇 #陳柏宇

符曉薇家中做運動囡囡搗蛋　陳柏宇被寸Hea跑揈唔甩肚腩

Jason一家留家抗疫期間發福不少。

近日本港爆發第三波疫情，專家呼籲市民盡量減少外出，以免疫情擴散。然而在留家抗疫期間，不少人都呻食多咗又冇做運動，搞到發福暴肥！昨日，陳柏宇（Jason）太太符曉薇（Leanne）就喺IG貼出一幅「厭世照」，並留言自爆：「因為天氣太熱近排食咗好多雪糕，陳宅增肥計劃。」所以之後她亦貼出在客廳做運動的短片，不過，片中就見到1歲多的囡囡Abigail在媽咪身邊行來行去，仲忽然拉起塊瑜伽墊，搞到Leanne無奈中斷運動，事後她又寫道：「係（喺）我屋企要做運動係好難嘅一件事，陳小姐係一個搗蛋王。」

至於Jason就醒目得多，索性捉實Abigail手仔一齊做Sit up，讓囡囡玩得開心，自己又做到運動，但Leanne就爆：「我老公無做運動幾個世紀，佢今日突然話落去跑步，之後仲同我哋講上嚟會無咗肚腩，我答咗句天真，我係咪好衰呀？」結果跑完番嚟有冇成果呢？Leanne再貼出另一條短片，她問老公：「你個肚腩仲喺度嘅？又話跑完番嚟冇嘅？」Jason聞言即尷尬傻笑：「我唔捨得佢（肚腩）……」被問到跑了多久？Jason再次心虛笑道：「跑咗15分鐘，嘻嘻！」真係跑咗好「耐」喎！辛苦晒！