2020年11月6日星期五

【頭條獨家】牛仔背心襯牛仔褲行街 65歲任達華原來係親善大使 #任達華

牛仔背心襯牛仔褲行街 65歲任達華原來係親善大使

華哥一見記者就用V字手勢打招呼，上車又畀手指公。

首先恭喜任達華，不久前喺「中國電視金鷹獎頒獎典禮」中憑劇集《澳門人家》獲「最佳男演員」獎，係首名得到呢個獎嘅香港男藝人。雖然已經65歲，入行45年，但華哥無話退落嚟，有戲就拍有劇就演，最難得年近7張都仲好見得人。日前下午，戴住Cap帽，着住白Tee加牛仔背心配牛仔褲嘅華哥現身銅鑼灣，見到記者又舉V又竪起手指公又拜拜，一隻手可以做嘅友善手勢都做勻，華哥真好。採訪:梁志明

拎過唔少影帝獎項嘅任達華對於奪視帝表現激動，佢接受訪問時說：「我都係拍電視劇出身，後來轉拍電影，現在偶然又拍返電視。拍電視就好似一個大家庭咁溫暖嘅感覺，多謝太太同女兒，因為有4個月無見面，佢哋畀我好大動力。」華哥一家人的確好有愛。

日前下午，着到好Young又好Fit嘅華哥喺銅鑼灣出現，見佢喺利舞台附近講電話，講電話時將個口罩拉低咗見到個鼻，又係咁用手掂個口罩，雖然疫情又再度緩和，但都要留意。講完電話就行咗去白沙道，當時華哥架七人車已經喺度，不過華哥冇即刻上車，因為佢見到有間賣運動衫嘅店舖，所以就行咗入去兜兩個圈，佢主力睇波鞋，不過睇咗陣冇心水就閃，上車前，華哥同記者打招呼，又舉V又竪起手指公又拜拜，不如下次畀埋心心吖。