以往聖誕、元旦嘅紅館騷年年爆場，可謂一票難求， 網上更多次出現「絕望座位表」，不過一場世紀疫症，不少歌手無奈宣佈取消或延期個唱，而一向勇字貼心口的楊千嬅，適逢今年入行25周年，佢就願意博一鋪，舉行聖誕跨年演唱會賀一賀。大家以為降低入座率，再睇座位區預覽圖有一半「非公售座位」黑咗，以為啲門票有機會難買啲，之不過今年可能要打破跨年個唱「一票難求」呢個神話！
楊千嬅在紅館連開6場個唱由2020年12月23日至2021年1月1日，昨日公開發售，從門票銷售情況中，銷情未如以往踴躍，算係千嬅近年賣門票最艱難嘅一次。開售整整一日半，直至今晚7時06分，在城市售票網中，只有除夕(12月31日）最貴$980門票只剩「少量」，而最平嘅$380門票就售罄，其他場次仍可輕鬆買飛，呈現「希望座位表」。
有報道更傳出門票滯銷剩下大把位，終於唔使再硬食黃牛炒價，對於想睇騷嘅港人嚟講係開心事！之不過網上仍有不少黃牛唔死心，在網上兜售門票，遭網民狙擊叫啲黃牛留返啲門票煲醋，更反問「仲有人炒飛？」、「打擊黃牛就係必須，今鋪我撐」，有人再次回顧楊千嬅含笑與習近平握手嘅影片截圖，指楊千嬅個唱有14億人會睇，另有網民問楊千嬅會否請汪阿姐做嘉賓傾返月餅事件？
其實千嬅今次銷情一般，絕對受環境影響，一來仲未通關，平時有唔少大陸人走落嚟睇騷，二來疫情影響，就算搶到紅館黃金檔期都真係要博一博，隨時銷情慘淡收場，所以烈女千嬅算係相當勇。此外，她最近亦努力做YouTuber化身「煮」持教大家整餸，同時又打人情牌搵嘉賓順便一邊煮一邊傾偈，由於而家仍係起步階段，訂閱人數暫未過萬，只７千幾人訂閱，看來雙線發展嘅千嬅，真係要多加努力先得。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
