《全民造星III》總決賽今晚假九龍灣Star Hall舉行，10強經過三回合激鬥，結果由黑馬折骨舞王Ben（趙祥誠）奪得冠軍，大熱陳葦璇和ANSONBEAN（陳毅燊）分別屈居亞軍和季軍。
面對今晚全城關注的《造星III》，大台有樣學樣急推航空業才藝比賽《衝上雲霄大選》硬撼，可惜未能製造任何聲勢和話題。經過3個多月比賽和訓練，10強包括葉巧琳（Mischa）、Cloud（雲浩影）、陳葦璇、ANSONBEAN、KLAU（劉瑞祈）、Kimman（黃劍文）、CY（陳澤言）、NY（鍾諾言）、Ben和Alina（李靜蓮），今晚在三回合比賽施展渾身解數爭奪冠軍寶座，並由毛舜筠、鄧麗欣、王菀之和ViuTV製作部副總裁金廣誠擔任評判，與觀眾網上投票分數各佔一半選出冠軍。
在首輪比賽之前，大會先公佈全民投票結果，Cloud得到32.6%領先，而在頭兩輪過後，大熱之一的陳葦璇在評判心目中以37分暫排第一。結果決賽比賽完畢，前三名竟然同分，一樣有17分，要由觀眾投票比例分勝負，結果一如賽前參賽者們所想，Ben成為今年冠軍，陳葦璇得第二，ANSONBEAN得三。
賽後評判毛舜筠和鄧麗欣一齊接受訪問，對於三甲同分，問到再揀會揀邊個？毛姐笑說：「都係揀ANSONBEAN，因為好平均，由唱、跳到樣，都係一粒星嚟，呢一季一定揀佢，第一季就揀姜濤。」她認為唱得的人，在演戲方面亦可以發揮得好好，續說：「咁靚仔梗係可以演戲，唱歌都係表達情感，當然都要公司畀機會。」而鄧麗欣則讚陳葦璇表現平均：「佢好穩陣，完全冇失過準。不過，阿Ben攞冠軍又好好，觀眾揀佢，咁造星都係一個講觀眾緣嘅節目，阿Ben好有呢樣嘢。」《全民造星III》今年主題是「藝人再出道」，ViuTV製作部副總裁金廣誠表示今年沒有獎金和獎品，只是給予一個平台讓大家踏出一步，讓大家更認識一班參賽者，他說：「因為佢哋都有公司，希望有個共識會有平台畀佢哋，拍劇畀佢哋做多啲嘢。」至網民投訴無法投票，他否認電腦故障，並透露會計劃開第四季《全民造星》，亦不會刻意跟TVB比較，說：「最重要做好自己，俾大家都有選揀。」
ViuTV《全民造星III》總決賽完結後，播出《造星》彩蛋，節目中播放10強演變過程及一路以來的參賽感受，而《造星》監製花姐，在播完片後與10強參賽者及冠亞季軍一同現身，當阿Ben被問到得獎感受時，他指當宣佈完亞、季軍後，以為沒有自己份，之後他便感謝林二汶、阿祖、《造星》參賽者及台前幕後，講到眼濕濕的他，講完後更要用紙毛巾抹眼淚。
至於亞軍陳葦璇謂自己對賽果覺得surprise，因自己一向專注訓練，故沒想到原來觀眾也會喜歡她這一類型。而ANSONBEAN就興奮地表示自己好開心，不過就被Error的肥仔踢爆他事前曾對決賽要處理3個項目感擔心。至於大熱倒灶的Cloud，則表示對賽果沒有失望。
而身為《造星》監製的花姐，亦承認對Ben「跌眼鏡」，皆因最初看到Ben時，完全覺得不會入10強。而花姐更以「騎呢」來形容今屆的參賽者，但她指經常導師的幫助以及他們投入努力後，便開始看到他們的質素，繼而覺得很感動。而肥仔之後又笑言見「本身冇乜朋友」的花姐今屆多了很多朋友，結果即被花姐恐嚇，叫他「講嘢小心啲」。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
