《萬千星輝頒獎典禮2020》尋晚圓滿結束，直播騷唔多唔少會出現蝦碌情況，好似頒發「最受歡迎男角色」，頒獎嘉賓胡定欣同馬德鐘揀幾位演員介紹時，講到資深演 ...
《萬千星輝頒獎典禮2020》尋晚圓滿結束，直播騷唔多唔少會出現蝦碌情況，好似頒發「最受歡迎男角色」，頒獎嘉賓胡定欣同馬德鐘揀幾位演員介紹時，講到資深演員劉丹，胡定欣突然大叫「丹爺」，又指佢喺處境劇《愛．回家》由馬家做到熊家，陪足大家8年，未知係咪太感觸，劉丹一度誤以為自己得獎，企喺身想上前領獎，胡定欣見狀即補句：「我希望！」場面尷尬。
馮盈盈擔任當晚司儀之一，頒到「最受歡迎電視歌曲」三強時，佢講錯《哭牆》由譚嘉儀主唱，其實係谷婭溦至啱，點知搞到「谷粉」嬲嬲豬。事後馮盈盈拍片合十道歉，自認擔任司儀太緊張，所以口快快講錯！
