經歷家庭慘事人生跌落谷底 黃劍文綵排音樂劇崩潰爆喊
黃劍文(Kimman)自參加ViuTV節目《全民造星III》後多咗好多人認識，工作量大增，下月5日及6日將會同陳明憙及陳凱彤參演音樂劇《攜手瞳行慈善音樂劇場》演視障人士。雖然喺《造星III》演過音樂短劇《某一種悲傷》，但只係齋唱冇對白，今次要他聲嘶力竭大發脾氣，綵排時已崩潰了一粒鐘，真係好大挑戰。採訪：方騫平 攝影、譚壹致
平日黃劍文好好笑容，原來他好似音樂劇男主角Gary咁，曾跌到落谷底，所以演起嚟真係好有feel！雖然首次挑戰音樂劇，就連成日畀意見佢嘅老友周慧敏都話好放心，深信佢一定勝任。
Kimman自爆綵排時，導演要求他keep住情緒，成個人崩潰倒地，嗌到連聲都拆埋，眼淚鼻涕抹到兩袖都濕晒，相當痛苦。至於陳明憙（Jocelyn）就冇咁激動，最大挑戰係由小學生演到大人：「因為係視障人士，所以由細到大會畀人蝦。為咗突出舞台效果，我會束孖辮，提高聲調嚟扮小學生，仲會用拳頭打自己。」陳凱彤相對簡單得多，導演只叫佢嗲聲嗲氣，發吓姣就過關。講到人生低潮，Kimman有傷感的過去，他自爆媽咪喺11年前因為抑鬱症，在她住所燒炭輕身：「事發喺我生日後5日，我真係接受唔到，加上兩歲時經已冇咗生父，爸爸離家後再冇聯絡，一直有被遺棄嘅感覺，媽媽嘅離開令我一度上咗露台尋死，好記得去韓國散心時喺街頭曾經放聲大叫嚟發洩，好彩最後有信仰令我意智堅定，𠵱家細佬妹都長大，我會好好照顧公公及婆婆，生活叫做過得安定。」
來源 source: http://hd.stheadline.com
|
鍾意就快D Share啦！
|
|
|
