殿堂級樂隊太極成軍三十五年，樂隊成員音樂造詣深厚，更充滿使命感，雖然95年分頭發展始終不離他們的音樂夢想，一直是樂壇中流砥柱，當中主音及結他手鄧建明(Joey），近年成為ViuTV皇牌節目《Chill Club》的音樂總監兼Bandleader ，帶領一班年青創意團隊，創造出新一代龍頭音樂節目，成為疫市奇葩。雖然八月太極35周年音樂會如箭在弦，已經是ViuTV代表人物的Joey，便預告將缺席TVB音樂節目宣傳：「音樂嗰啲我唔得，因為有少少對衝，佢哋可以去！」
今年八月太極將在紅館舉行35周年紀念音樂會「Rainbow After Rain」，一班成員再次聚首開騷，奈何鍵琴手唐奕聰（Gary）三月卻因心臟病離世，為音樂會抹上一絲遺憾；不過，太極音樂陪着樂迷成長，經典歌曲就是大家的集體回憶，亦代表着太極不變的音樂信念，再多風雨都可以走過！
同所有香港人一樣，太極走過疫情低谷，眼見不少音樂工作者工作因疫情停下來， Joey不諱言都有因疫情擔心過，怕僅餘的工作都會受影響，惟有努力謹守崗位做到最好。雨後會有彩虹，努力亦會有回報。太極隊員個個音樂造詣深厚，當中主音兼結他手Joey Tang，一直身兼樂隊領班、唱片監製、主音及結他手多重身份，甚至做過唱片公司音樂部總監。近年他擔任ViuTV皇牌音樂節目《Chill Club》的音樂總監及Bandleader ，成功用音樂創造奇蹟。《Chill Club》已經成為香港樂壇的新勢力，今年四月創辦首個《Chill Club》音樂頒獎禮，更被譽為是年度樂壇盛事，氣勢凌駕對手，身為節目靈魂人物的Joey Tang功不可沒。
- 太極鍵琴手唐奕聰（Gary）今年三月因心臟病離世，未能參與八月舉行的「太極35周年音樂會」。
《Chilli Club》團隊好年青
《Chilli Club》團隊好年青
「我係睇到一樣嘢，成個團隊佢哋好年青，導演、監製，佢哋好細個，可能得廿二、三歲，我去到好似去咗間中學，好似變番自己中學畢業咁，嗰次頒獎禮感受最深，由半年前開始籌備一個show，我哋每日都通電話，我哋都有份參與，佢哋諗咗一啲橋出嚟，大家一齊度！「佢哋個感覺係好有朝氣嘅，好似自己班同學，一班同學仔咁，嗰晚完咗show之後，大家好開心，又喊晒，好耐冇見過呢種氣氛！」有份參與《Chill Club》頒獎禮的雷有輝（Patrick），亦被一班充滿熱誠的年青人感染。「我就係感受到好開心，我直情喺廠嘅rehearsal ，我未見過監製、編導，佢哋睇住樂隊綵排可以咁郁晒，好投入嗰件事！」Joey坦言疫情最嚴峻時，《Chill Club》令他重拾朝氣。「呢一年嘅得着，其實就係喺呢一班朋友身邊，帶番個朝氣俾自己。」
- 擔任《Chilli Club》音樂總監兼樂隊領班的Joey Tang，每星期帶着他的樂隊坐陣演出，節目燈光和氣氛猶如置身演唱會中，令觀眾看得投入。
放許多input
放許多input
不只觸動樂迷的心，就連太極成員都被感動，太極結他手劉賢德（Ernest），對隊友Joey給節目帶來的衝擊和影響力讚不絕口。「佢冇講，呢個係我作為局外人嘅睇法，Joey哥喺《Chill Club》裡面，係嗰班係後生仔，但一定要有佢咁有Experience 嘅人俾到咁多input 個騷，呢個騷先會做得咁成功！」不過大師級的Joey就謙遜將功勞交給整個團隊。「嗰隊Band嘅成員，其實一直以來呢十幾廿年，都同我一齊去做好多唔同嘅嘢，好多input 、output 都係大家一齊，呢件事係大家一齊做出嚟！」
成《Chill Club》靈魂人物
成《Chill Club》靈魂人物
由19年10月開始第一集《Chill Club》到現在，節目已經做到第五季，已經成為ViuTV長壽音樂節目；製作充滿朝氣，著重音樂大同，邀請過不少新舊甚至隱世歌手演出。
Joey透露：「講返第一次開會，佢哋真係有好好嘅接受能力，我去開會，佢哋問我覺得個騷點，我好單純嘅，因為睇好多外國節目，覺得應該有好多煙，藍色好似一個演唱會舞台咁樣，然後佢哋真係做出嗰種感覺，好似一個騷咁樣，即係佢哋好肯接受。我只係將我嘅理想話俾佢哋聽！」Patrick亦大讚：「個Tone已經係signature！」身為《Chill Club》靈魂人物，Joey亦預告會缺席TVB音樂節目為太極concert宣傳！
「我就暫時，如果音樂嗰啲我唔得，就有少少對衝，因為我都做緊音樂嘅節目，但佢哋可以去嘅！」面對疫情低谷，太極其餘幾位成員亦將困難化成正能量，雖然少了工作，但賺回了屬於自己的時間。Ernest直言：「我有三個小朋友，有兩個喺外國，有一個喺英國返咗嚟，我嘅得着係成個疫情我成日陪住佢，成日同佢一齊。另一樣嘢都係好處嚟，我可以重拾返以前冇時間做嘅嘢，以前買咗好多唱片，放埋一邊都冇時間聽，但因為呢個疫情，有好多private 嘅時間，可以做自己嘅嘢！」 ![太極樂隊早前上ViuTV《Chill Club》演出，為8月的演唱會宣傳。]()
- 太極樂隊早前上ViuTV《Chill Club》演出，為8月的演唱會宣傳。
疫情陪仔行山
鼓手Ricky（朱翰博）亦有感而發：「疫情最嚴重嘅時候，我陪咗我個仔成日去行山，因為大家都冇咁忙，我音樂學校又唔係上咁多堂，有好多學生嚟唔到，行山做多啲運動，陪屋企人嘅時間係多咗。不過跟住我又好擔心，返學校睇好多，「當時都有接近一半學生冇嚟，所以都要去諗吓點樣快啲開拓啲譬如視像課程，要諗好多唔同嘅方案，嗰時其實仲忙，但我覺得係一個考驗，
「以前沙士都試過有呢個情況！我諗要面對！係一個考驗！」Joey：「咁有冇人同你一齊面對？」Patrick亦插口：「有親人陪？」Ricky：「親人嗰陣好似都冇嘢撈，親人都幾得閒！」
眾人你一言我一語充滿娛樂性，亦可見他們手足情深。 ![近日盛傳和戴夢夢復合的朱翰博（Ricky），坦言沒有再婚計劃。]()
- 近日盛傳和戴夢夢復合的朱翰博（Ricky），坦言沒有再婚計劃。
同戴夢夢好夾
近日盛傳與戴夢夢復合的Ricky，亦開腔剖白二人的關係。
「因為識咗都幾年，關係點都好，大家都係會互相關心，而且佢又搬咗去我附近住。「因為有一樣嘢係真，都可以講，我同佢大家諗法好相似，鍾意嘅嘢好相似，譬如佢搬屋，鍾意嗰啲裝修、嗰啲設計，大家好鍾意點樣整間屋，有啲嗜好，同埋食嘢，溝通好夾嘅！「暫時保持咁嘅關係！」提及可有再婚計劃，他直言被之前婚姻失敗嚇怕，表示無意改變現時兩人的相處方式。「覺得呢樣嘢有少少恐懼，所以都冇咁嘅打算，亦都冇咁嘅機會，除非……嚟緊睇吓點，唔知道！「一定有啲恐懼，好正常，我見過好多類似嘅case都係咁，離咗婚通常有一段時間都恐懼。」
所有幸福俾太太
相比其他成員，主音Patrick可說受疫情影響最大，他的首個個人音樂會，更因疫情四度延期，本來是大小演唱會和音中堅分子的他，以往每逢週末都出埠演出，卻因疫情幾乎完全停工，不過有更多時間陪家人，換來與太太兒子關係更親密，什麼都值得！「呢個疫情冇得出去做其他嘅show，同太太其實開頭係多咗少少拗撬，因為見得多，但其實原來呢一下，又可以慢慢適應番，大家好似更加認識對方，又重新去認識多次。
「所以近呢半年，大家感情更加好過以前，加埋阿仔又多咗時候，多咗共同嘅嗜好，大家會一齊聽吓黑膠，呢排佢又鍾意玩下菲林相機，其實之前我都有玩下影相，變咗共同嘅話題多咗，大家可以好似朋友咁傾到偈。」曾經講過可能夾band比較多情，加上年少氣盛又有些知名度，特別容易結識異性，Patrick同太太便經過四次離合，才於2000年結婚修成正果，他感激上天給他一個幸福家庭！「因為我一個咁衰嘅人，佢都肯不離不棄，所以有生之年都會將所有幸福俾晒佢。呢個係我呢一世都要俾到佢嘅嘢，亦要感恩上天俾我一個咁好嘅家庭，唔單只係老婆，因為個仔都係好特別嘅，所以要好珍惜。」 ![Joey透露《Chill Club》構思初期，亦有邀請太極隊友雷有輝作為樂隊成員一份子，不過當時疫情還未爆發，身為大小演唱會和音中堅份子的Patrick，幾乎每個週末都要出埠演出，最終沒有參與！]()
- Joey透露《Chill Club》構思初期，亦有邀請太極隊友雷有輝作為樂隊成員一份子，不過當時疫情還未爆發，身為大小演唱會和音中堅份子的Patrick，幾乎每個週末都要出埠演出，最終沒有參與！
最唔識social
太極七子85年出道，已經憑《暴風紅唇》奪得嘉士伯流行音樂節全場總冠軍，之後推出的《紅色跑車》、《迷》、《留住我吧》、《Crystal》更奠定他們火紅樂隊地位。甫出道便爆紅，對於當年只得20歲的年青小伙子，突然如來的名氣，都曾令他們不知所措。Patrick坦言：「嗰時可能會係好開心，亦都嗰時細個，可能冇咁識得珍惜嗰時得到嘅嘢，會唔覺意得罪咗人，冇咁小心識去處理！」Ernest補充：「我哋細個未識得咁多人情世故！」Joey不諱言他們外表睇落好cool，但其實因為內斂唔識交際：「你會覺得我哋好串咁，其實唔係，嗰時我哋好怕醜，我哋反而係最唔識social 嘅一對樂隊，起碼我自己唔敢主動，唔係串嘅，等如我依家見到啲後生嘅，點解唔睬我，跟住我問番佢哋，佢哋話好驚我哋，就係咁嘅情況。」 ![太極成員好有默契，坐埋一齊做訪問，就好似平日聚會傾偈一樣，相當有親切感！]()
- 太極成員好有默契，坐埋一齊做訪問，就好似平日聚會傾偈一樣，相當有親切感！
拒絕妥協
本來就夠自我，太極一路走來堅持音樂理想實事求是不嘩眾取寵！亦曾因為不妥協而失望過，95年他們合作十年後，在北京製作大碟《Utopia 》後決定分開發展。原來他們曾被唱片公司要求創作較商業的歌曲。「我哋一出嚟就做唱片，就一齊十年，跟住大家有啲理想，好似Joey、Patrick、德哥咁！」低音結他手兼太極領隊蛇仔（盛旦華）說Joey亦透露當時面對着一個難題：「再加埋一樣嘢，有人要我哋作一啲歌，覺得我哋嗰啲唔夠好！」Patrick：「覺得我哋作嘅唔夠經典，要經典啲！」
Joey：「又唔係話好商業嘅，係話我哋嗰啲唔係好夠，唔係老闆諗到嘅嘢囉！」Patrick：「佢話要作首歌俾我哋！」蛇仔：「但呢個唔係主要原因，坦白講當時所有人都好忙，點解要去北京？就係因為大家都有工作，去到後期直情無時間創作歌曲。後來先諗到一個方法，就係去北京錄音。往事如煙，但真我太極始終如一，歲月可以留下風霜，但吹不散太極堅毅的團隊精神！ ![太極95年推出大碟《Utopia 》之後分開發展，唱片更在北京錄製，原來唱片封套最初不是這個版本。]()
- 太極95年推出大碟《Utopia 》之後分開發展，唱片更在北京錄製，原來唱片封套最初不是這個版本。
撰文：琪琪
攝錄：曾衞惠
場地提供：南洋酒店
----------------------------
和你壹起撐住香港主題海報 全港良心商戶免費派發
了解更多
----------------------------
和你壹起撐徽章 良心商店及網店有售
了解更多
-----------------------------
守住新聞自由 和你撐壹週刊計劃 每月港幣$300起
按此了解更多
- 太極樂隊早前上ViuTV《Chill Club》演出，為8月的演唱會宣傳。
- 近日盛傳和戴夢夢復合的朱翰博（Ricky），坦言沒有再婚計劃。
- Joey透露《Chill Club》構思初期，亦有邀請太極隊友雷有輝作為樂隊成員一份子，不過當時疫情還未爆發，身為大小演唱會和音中堅份子的Patrick，幾乎每個週末都要出埠演出，最終沒有參與！
- 太極成員好有默契，坐埋一齊做訪問，就好似平日聚會傾偈一樣，相當有親切感！
- 太極95年推出大碟《Utopia 》之後分開發展，唱片更在北京錄製，原來唱片封套最初不是這個版本。
來源 source: http://nextplus.nextmedia.com
|
鍾意就快D Share啦！
|
|
|
