炎明熹（Gigi）、姚焯菲（Chantel）、鍾柔美（Yumi）、冼靖峰（Archie）、何晉樂（Rock）5位《聲夢傳奇》學員，到底邊位能夠創造傳奇成為冠軍，嚟緊19號晚決賽自有分曉，不過佢哋未攞到名次前，早已成為明日之星，仲已經幫無綫賺錢添！
近日有網民發現其中3位美少女學員嘅參賽歌，好似Gigi嘅《沒有你還是愛你》、Chantel嘅《戀愛預告》同Yumi嘅《心急人上》版本，全部喺卡拉OK度上架，即係話歌迷可以同心目中嘅女神，匿埋喺間房仔度開party一齊合唱，相信啲fans覺得開心之餘，無綫就最高興，因為佢哋未算正式出道，就可以幫公司賺錢收版權費！
而最令人覺得佢哋犀利嘅係，原來佢哋唔止喺香港受歡迎，仲已經紅到返內地，又有網民發現15位學員喺節目選唱嘅參賽歌曲，喺一個內地嘅音樂平台有得點播，因為呢個都係收費平台，換言之又為無綫賺多筆！
不過有網友對於卡拉OK用3位美少女嘅版本嚟「吸客」頗有意見，質疑佢哋冇新歌又做乜要搞個唱K版，呢句說話即觸動晒3位學員嘅粉絲，狂轟話：「唔鍾意咪唔好唱囉」、「我覺得佢哋個版本更好聽喎」。
另外，被淘汰出局嘅文凱婷因為眼部發炎，昨晚（17日）要戴太陽眼鏡應戰後，網上就流出佢冇戴太陽眼鏡嘅相，見佢嘅眼疾嚴重，連眼都擘唔開，非常可憐，其實佢傷到咁又明知會輸都照出賽，都算有體育精神，抵讚！
本文作轉載及備份之用 來源 source: http://hk.on.cc
|
鍾意就快D Share啦！
|
|
|
