港姐昨晚（22日）舉行準決賽（4）關楓馨才藝表演時，有爸爸關禮傑上台作「雙手聯彈」支持，但事後被大批網民批評「靠父蔭」，對其他佳麗不公平。今早她現身港姐記招時被記者追問，她靦腆解釋：「爸爸都唔係幫手，琴都係我自己彈嘅，之前有同其他佳麗討論過，決定畀少少驚喜觀眾啫。」
她又否認爸爸出手幫「拉票」：「其實施茉莉唱歌嘅時候，都搏到全場掌聲。（依家網民話對其他佳麗唔公平？）我諗每個人睇事嘅感覺都唔一樣，當然會有人鍾意、有人唔喜歡，我哋會吸取教訓嘅，下次未必會係咁。（仲有下次？）係下次唔會用番！」
她又坦言在問答環節上，有少許緊張：「壓力係自己畀自己嘅，唔關外界事。（有信心入三甲？）我仲未消化到尋晚成件事，冇諗到咁遠，畀啲時間我，最緊要盡量表現到自己、有進步，咁就無悔喇。」
節目統籌經理何小慧及項目統籌顧問鍾子綸一同受訪。對於（20）梁菁琳缺席，小慧表示對方因食物敏感嚴重，知道她有很多東西不能進食，平日已很小心，參加訓練時更會自攜餐食：「真係冇辦法，佢尋日拜神，大煙啲都有影響。佢今日有返到嚟電視城嘅，不過見暈又想嘔，我見佢不在狀態，就話唔好夾硬嚟，寧願休息吓，身體好啲就參加下午嘅其他工作。」問到可擔心對方總決賽會因敏感發作，而產生突發問題，她說：「唔會，未去到咁嚴重，佢身體狀況一直都ok嘅。」
至於安排關禮傑上台力撐愛女（4）關楓馨惹來爭議，小慧表示：「紅組表演係故事設計形式，女生夢見爸爸同自己一齊彈琴。（網民戥其他佳麗不值？）都係想大家（指記者）有啲嘢寫，我哋好公平，啲女仔都清楚自己負責嘅表演。」
對於（1）梁允瑜落選後稱賽制不適合自己，小慧表示：「知道佢唔開心，我哋都有喺後台同佢傾番，可能佢嘅負面新聞以及腳傷都有少少影響。 （佢講賽制。）今年係同以前有分別，5位評判有細心閱讀過所有佳麗嘅背景資料，正式上台前又有同佢哋逐個傾偈了解，可能有佳麗冇諗過咁快被淘汰啩。（落選嘅會安排試鏡？）知道佢哋好多都想入行，之前都安排咗啲鍾意唱歌嘅去同星夢高層何麗全見面，遲啲會預約錄音室，等佢哋正正經經唱歌，畀啲唱片監製聽。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
