姚子羚（Elaine）唔經唔覺已經41歲，但依家仍然Keep住樣靚身材正，相當犀利。不過Elaine因出道時眼細細，曾被網民惡搞改圖，將佢喺劇中講「表哥」一幕嘅眼睛，P成豆豉咁細粒，因而有「表哥」呢個花名。
而近日就有一間曾經與多名TVB藝人合作嘅眼科診所，用咗Elaine嘅改圖相喺社交網做宣傳，仲喺貼文抽水咁話：「眼夠大先可以做矯視？擘大眼呀表哥！姚表哥咁樣！如有類同，實屬巧合。」雖然圖片已打格，但仍然睇得出喺Elaine嘅改圖照。而網民見相後即刻嬲爆狠批，認為該診所嘅宣傳手法有問題，對Elaine極唔尊重，引發公關災難！
去到昨日（20日）該眼科診所喺社交網發出道歉聲明，寫到：「就較早前貼文中不恰當使用姚子羚小姐的相片和措詞，對姚小姐所造成的不便，以及對公眾造成影響，深表歉意。我們已與姚子羚小姐本人聯絡及表達最深切的歉意，姚小姐亦已接受了我們的道歉。」不過該貼文冇耐就被刪除。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
